Rain in Maharashtra : राज्यात होणार पावसाचं दमदार पुनरागमन, या जिल्ह्यांना ऑरेंज अलर्ट, अशी असणार परिस्थिती

जालना : राज्यात मागील 2 दिवसांपासून पावसाचा जोर काहीसा कमी झाल्याचे चित्र पाहायला मिळालं. आता मात्र 13 जुलैपासून राज्यात पुन्हा एकदा पाऊस जोर धरणार आहे. 12 जुलैसाठी राज्यातील 5 जिल्ह्यांना ऑरेंज अलर्ट तर 13 जुलैसाठी संपूर्ण कोकण, पश्चिम महाराष्ट्रातील पुणे आणि सातारा या जिल्ह्यांना ऑरेंज अलर्ट देण्यात आला आहे.

पुढील 24 तासांमध्ये कोकणातील बहुतांश जिल्ह्यांमध्ये मुसळधार ते अति मुसळधार पावसाचा इशारा देण्यात आला आहे. तर मध्य महाराष्ट्रातील घाटमाथ्यावर उत्तर मध्य महाराष्ट्रात तुरळ ठिकाणी हवामान विभागाने मुसळधार पावसाची शक्यता वर्तवली आहे. विदर्भामध्ये देखील वादळी वाऱ्यासह मध्यम स्वरूपाच्या पावसाची शक्‍यता आहे. राज्यात उद्या 13 जुलै रोजी हवामानाची स्थिती काय राहील, हे आपण जाणून घेऊयात.

विदर्भामध्येही सोसाट्याच्या वाऱ्यासह मध्यम स्वरूपाच्या पावसाचा इशारा हवामान विभागाने दिला आहे. विशेषतः पूर्व विदर्भात पावसाचा जोर हा अधिक असणार आहे. नागपूर, चंद्रपूर, वर्धा, भंडारा, गोंदिया आणि गडचिरोली या जिल्ह्यामध्ये पावसाचा जोर अधिक असेल.