अंधारे-फडणवीसांची जाहीर माफी पण रामराजेंना इशारा, शेर को धमका सकते है, डरा नहीं सकते!

फलटण : फलटण उपजिल्हा रुग्णालयातील डॉक्टर युवतीच्या आत्महत्येच्या अनुषंगाने होत असलेल्या आरोपांचे खंडन करण्यासाठी माजी खासदार रणजीतसिंह नाईक निंबाळकर यांनी फलटणमध्ये जाहीर पत्रकार परिषद घेतली. सुषमा अंधारे यांना कुणी वाईट बोलले असेल, त्यांच्याविषयी आमच्या कार्यकर्त्यांपैकी कुणी अपशब्द बोलले असेल तर क्षमा मागतो तसेच माझ्यावरील आरोपांमुळे देवेंद्र फडणवीस यांनाही वाईट शब्दात बोलण्यात आले, त्यांनाही त्रास झाला असेल तर क्षमा याचना करतो, असे रणजीतसिंह नाईक निंबाळकर म्हणाले. पण त्याचवेळी त्यांनी विधान परिषदेचे आमदार रामराजे नाईक निंबाळकर यांना शेर को धमका सकते है, डरा नहीं सकते, असा इशारा दिला. मला लक्ष्य करण्यासाठी रामराजे नाईक निंबाळकर यांनीच विरोधकांना माहिती पुरविल्याचा थेट आरोप रणजीतसिंह नाईक निंबाळकर यांनी केला.