बोकड आहे की बैल! उंची 5 फूट अन् वजन तब्बल 170 किलो, गुलाम-ए-मुस्तफा पाहिलात का?

दस्तगीर बागवान यांच्याबाबत मूर्ती लहान पण कीर्ती महान असंच म्हटलं जातं. त्यांची स्वतःची उंची कमी असली तरी त्यांनी तयार केलेल्या बोकडांची उंची आणि वजन पाहिलं तर भले भले तोंडात बोट घालतात. यंदा त्यांनी तयार केलेल्या बोकडांची पायापासून कमरे पर्यंत उंची ही चाळीस इंच व पाया पासून शिंगांपर्यंत उंची ही पाच फूट आहे. त्याची लांबी साडे पाच फूट आणि वजन तब्बल 170 किलो आहे.

राजस्थान येथील कोटा जातीचा हा भारतातील सर्वात मोठा बोकड ठरला आहे. नुकतीच त्याची खरेदी पुणे येथील एका व्यक्तीने लाखोंच्या रकमेत केली आहे. दस्तगीर बागवान यांना खूप आधीपासून बोकड पाळायची आवड आहे. दीड वर्षाचा एखादा चांगल्या जातीचा बोकड खरेदी करायचा. वर्षभर त्याचे मुलासारखे संगोपन करायचे. त्याला आवश्यक खुराक द्यायचा, असा त्यांचा नित्यक्रम असतो.

रोज दोन लिटर दूध, सुका मेवा, हिरवी तरकारी, सफरचंद, मका, हरभरा, विविध प्रकारच्या डाळींचे मिश्रण हा गुलाम ए मुस्तफाचा रोजचा खुराक आहे. यासाठी दस्तगीर बागवान यांना रोज चार ते पाच तास द्यावे लागतात. शिवाय उन्हाळ्यात त्याच्या साठी स्वतंत्र कुलिंग व्यवस्था, आजारी पडल्यास डॉक्टर ही सर्व व्यवस्था केली जाते. मागील वर्षी त्यांच्या बोकडाचे वजन एकशे तीस किलो होते. या वर्षीच्या बोकडाचे वजन हे विक्रमी ठरले आहे. सध्या या बोकडाची देशभरात चर्चा असून मागील महीनाभरापासून बोकड पाहण्यासाठी लोकांची गर्दी होत होती.

गुलाम-ए-मुस्तफा पुण्याला पाठविण्यात आला, तेव्हा त्याला पाहण्यासाठी मोठी गर्दी जमली. टेम्पोमधून बोकड पाठविताना दस्तगीर बागवान आणि त्यांच्या संपूर्ण कुटुंबाचे मन भरून आले. पोटच्या मुलाप्रमाणे आम्ही बोकडाचा सांभाळ केल्याचे दस्तगीर यांनी सांगितले.