आई गेली पण लोकांना शुद्ध हवा मिळाली! लेकरांनी लावली तब्बल 1000 झाडं

सातारा : आपण आईशिवाय जगण्याचा विचारही करू शकत नाही, जर दुर्दैवानं तशी वेळ आलीच, तर जन्मोजन्मी आईच्या आठवणी, तिचा सहवास आपल्या मनातून जाणं शक्य नाही. आईचं पुण्यस्मरण म्हणून एका नव्या जीवाला जन्म देणं, त्याला वाढवणं यापेक्षा दुसरं पुण्याचं काम कोणतंच नसेल. मग हा जीव एखादं रोपटं का असेना. ते मोठं झाल्यावर किमान 4 जणांना सावली देऊ शकेल आणि शेकडो जणांना ऑक्सिजन देईल. जोपर्यंत हे झाड जगेल, तोपर्यंत आपली आई लोकांच्याही स्मरणात राहील, हाच व्यापक विचार करून सातारा जिल्ह्यातील काळोखे कुटुंबियांनी आईच्या प्रथम पुण्यस्मरण कार्यानिमित्त 1000 झाडांचं वाटप करून त्यांची लागवड करण्याचा कौतुकास्पद उपक्रम राबवला.

सातारच्या वाठार स्टेशन इथं हा उपक्रम पार पडला. विशेष म्हणजे आता दरवर्षी अशाप्रकारे वृक्षलागवड करण्यात येणार आहे. आई आपल्यातून जाऊन वर्ष झालं. तिच्या आठवणीत दरवर्षी कमीत कमी हजार झाडांची लागवड करायची, असा संकल्प काळोखे कुटुंबियांनी केला आहे. त्यांना गावकरी आणि गावातील विद्यार्थ्यांची साथ मिळाली.