कॉलेज तरुणीला धावत्या लोकलमधून ढकललं, 'तो' आला डब्यात घुसला अन्.., मुंबईतील भयंकर प्रकार

मिळालेल्या माहितीनुसार, पीडित तरुणी खारघर येथील एका नामांकित शिक्षण संस्थेत अभियांत्रिकीचं शिक्षण घेत आहे. गुरुवारी सकाळी आठच्या सुमारास तिने आपल्या मैत्रिणीसह पनवेल रेल्वे स्थानकातील फलाट क्रमांक तीनवरून सीएसएमटीला जाणारी लोकल पकडली. गाडी सुटत असतानाच शेख अख्तर नवाझ (५०) हा इसम महिलांच्या डब्यात शिरला.

डब्यात पुरुष आल्याचे पाहून तेथील काही महिला प्रवाशांनी त्याला जाब विचारला आणि खाली उतरण्यास सांगितले. मात्र, शेखने महिलांशी वाद घालण्यास सुरुवात केली. हा वाद इतका विकोपाला गेला की, रागाच्या भरात शेखने धावत्या लोकलमधून या १८ वर्षीय तरुणीला पाठीमागून जोरदार धक्का दिला. या धक्क्यामुळे तरुणी थेट रुळांवर कोसळली.

रुळांवर पडल्यामुळे तरुणीच्या डोक्याला, कंबरेला आणि हातापायांना गंभीर दुखापत झाली आहे. जखमी अवस्थेतच तिने आपल्या वडिलांना फोन करून घटनेची माहिती दिली. तिला तातडीने जवळच्या रुग्णालयात दाखल करण्यात आले असून सध्या तिची प्रकृती स्थिर असल्याची माहिती डॉक्टरांनी दिली आहे.

दुसरीकडे, तरुणीला ढकलल्यानंतर आरोपीने खांदेश्वर स्थानकात उतरून पळून जाण्याचा प्रयत्न केला. मात्र, डब्यातील सतर्क महिला प्रवाशांनी तातडीने रेल्वे पोलिसांना (GRP) याची कल्पना दिली. पोलिसांनी सापळा रचून शेख अख्तरला खांदेश्वर स्थानकातून ताब्यात घेतले.

पनवेल रेल्वे पोलिसांनी आरोपी शेख विरोधात बीएनएस कलम १०९, तसेच भारतीय रेल्वे अधिनियम कलम १६२ आणि १३८ नुसार गुन्हा दाखल केला आहे. वरिष्ठ पोलिस निरीक्षक विजय तायडे यांनी दिलेल्या माहितीनुसार, आरोपी शेख हा फिरस्ता असून त्याचे कोणीही नातेवाईक नाहीत. प्राथमिक तपासात त्याचे मानसिक संतुलन बिघडल्याचे दिसून येत असून, त्यातूनच त्याने हे कृत्य केले असावे असा अंदाज वर्तवण्यात येत आहे. न्यायालयाने आरोपीला तीन दिवसांची पोलीस कोठडी सुनावली आहे.