रिक्षा चालक ते आज गोल्ड मेडलिस्ट बॉडी बिल्डर, सोलापूरच्या पंचाक्षरी लोणार यांची प्रेरणादायी कहाणी!

सोलापूर : कोणतेही यश संपादन करायचे, मिळवायचे असेल तर मनातील जिद्द व चिकाटीने सहजपणे खेळ, व्यवसाय, शिक्षणामध्ये यशस्वी होता येते हे सोलापूरच्या सुप्रसिद्ध बॉडीबिल्डर पंचाक्षरी लोणार याने करून दाखवलं आहे. यामुळेच दररोज पाच ते सहा तास व्यायाम करून त्यानं शरीर पिळदार बनवलं. अंगी कठोर मेहनत, जिद्द, चिकाटी, परिश्रम, कष्ट करण्याची तयारी ठेवली अन् त्या मार्गानं प्रवास सुरू केला. रिक्षा चालक ते गोल्ड मेडलिस्ट पंचाक्षरी लोणार यांचा हा प्रवास कसा होता, आज या स्पेशल रिपोर्टच्या माध्यमातून जाणून घेऊयात.

पंचाक्षरी लोणार (रा. विजापूर रोड एस आर पी एफ कॅम्प विष्णुनगर सोलापूर) यांची घरची परिस्थिती अत्यंत बिकट होती. यामुळे शिलाई मशीन तयार होणाऱ्या कारखान्यामध्ये अगदी लहानपणीच त्यांनी मजूर म्हणून कामाला सुरुवात केली. मात्र, तेथेही घरची आर्थिक घडी बसत नव्हती म्हणून ऑटोरिक्षा चालवत कुटुंब सांभाळत फिटनेसची आवड चालूच ठेवली.