सदर लिलावात विरार बोळींज येथील 44 अनिवासी गाळे आणि चितळसर मानपाडा येथील 27 अनिवासी गाळे विक्रीसाठी उपलब्ध आहेत. 13 ऑक्टोबर रोजी सकाळी 11 वाजेपासून संगणकीय प्रणालीमध्ये पात्र ठरलेल्या अर्जदारांसाठी ऑनलाइन बोली स्वरूपातील ई-लिलाव www.eauction.mhada.gov.in या संकेतस्थळावर होणार आहे. 14 ऑक्टोबर रोजी सकाळी 11.00 वाजता https://eauction.mhada.gov.in व https://mhada.gov.in या दोन्ही संकेतस्थळांवर ई-लिलावाचा एकत्रित निकाल जाहीर करण्यात येणार आहे, अशी माहिती कोकण मंडळाच्या मुख्य अधिकारी रेवती गायकर यांनी दिली.

कोकण मंडळातील अनिवासी गाळ्यांच्या ई-लिलाव प्रक्रियेत भाग घेण्यासाठी https://eauction.mhada.gov.in संकेतस्थळावर नोंदणी करणे, ऑनलाईन अर्ज करणे, कागदपत्रे अपलोड करणे यासाठी 11 सप्टेंबर रोजी दुपारी 12.00 वाजेपासून ते  26 सप्टेंबर रोजी रात्री 11.59 वाजेपर्यंत मुदत देण्यात आली आहे. 26 सप्टेंबर ते 03 ऑक्टोबर या कालावधीत अर्जदारांनी सादर केलेल्या कागदपत्रांची पडताळणी केली जाणार आहे. अनामत रक्कम  08 ऑक्टोबर रोजी सकाळी 11.00 वाजेपासून  10 ऑक्टोबर रोजी सायंकाळी 5.00 वाजेपर्यंत अर्जदारांना भरता येणार आहे.

ई-लिलाव प्रक्रियेमध्ये सहभागी होण्यासाठी अर्जदाराचे वय ई-लिलावासाठी अर्ज करतेवेळी 18 वर्षांपेक्षा जास्त असावे, अर्जदाराने महाराष्ट्र राज्यातील सन 2018 नंतर काढलेले अधिवास प्रमाणपत्र सादर करणे आवश्यक असून ऑफसेट किमतीनुसार विहित अनामत रक्कम भरणे गरजेचे आहे.

सदर लिलावाबाबत विस्तृत पात्रता निकष, प्रत्येक गाळ्याचे विवरण, सामाजिक आरक्षण व अर्ज करण्याची कार्यपद्धती, सविस्तर अटी व शर्ती, ऑनलाईन अर्ज सूचना, माहितीपुस्तिका याबाबतची माहिती https://eauction.mhada.gov.in व https://mhada.gov.in या संकेतस्थळावरील Lottery>Eauction>eauction या पोर्टलवर उपलब्ध आहे. अर्जदाराने संकेतस्थळावरील व माहिती पुस्तिकेतील सविस्तर सर्व अटी व शर्ती काळजीपूर्वक वाचूनच अर्ज सादर करावा, असे आवाहन मंडळातर्फे करण्यात आले आहे.