बोलायला नीट जमलं नाही, उद्धव तू परत ये... 'शिवतीर्थ' भेटीचं कारण संजय राऊत यांनी सांगितलं

मराठी माणसांसमोर आमच्यातले मतभेद क्षुल्लक आहेत, असे राज ठाकरे म्हटल्यानंतर मराठीच्या मुद्द्यावर दोन्ही बंधू एकत्र आले. वरळीत झालेल्या सभेतच महापालिका निवडणुकाही एकत्र लढवू, असे संकेत उद्धव ठाकरे यांनी दिले. त्यानंतर उद्धव ठाकरे यांच्या वाढदिवसानिमित्त अभिष्टचिंतनासाठी राज ठाकरे मातोश्रीला गेले. पुन्हा गणेशोत्सवात उद्धव ठाकरे सहकुटुंब शिवतीर्थावर गेले. दोन्ही नेत्यांमधला कौटुंबिक जिव्हाळा चर्चेत असताना वेळ आली होती राजकीय जवळीकतेची! महापालिका निवडणुका तोंडावर आलेल्या असताना थेट चर्चा करून वाटाघाटीसाठी भेटणे गरजेचे होते. त्याचमुळे आज उद्धव ठाकरे यांनी राज ठाकरे यांची भेट घेतल्याचे कळते. परंतु आमच्यात राजकीय चर्चा झाली नाही, असे संजय राऊत यांनी माध्यमांना सांगितले. उद्धव ठाकरे यांच्या शिवतीर्थ भेटीसाठी राज ठाकरे यांच्या मातोश्री कुंदा ठाकरे या कारणीभूत असल्याचे राऊत म्हणाले.