Cyber Crime : 'हॅलो तुम्ही सिलेक्ट झाला आता फक्त..' तरुणीला 90 हजारांना गंडा, वर्धा पोलिसांची थेट दिल्लीत कारवाई

वर्धा, 9 सप्टेंबर (नरेंद्र मते, प्रतिनिधी) : देशात इंटरनेट क्षेत्रात क्रांती झाल्यापासून सायबर गुन्ह्यांमध्ये झपाट्याने वाढ होत आहे. दिल्लीतील अशाच एका रॅकेटचा पर्दाफाश वर्धा पोलिसांनी केली आहे. एअरलाईन्समध्ये नोकरी, खोटे क्रेडीट कार्डसह खोटे लोन देण्याचे आमिष दाखवून कॉल सेंटरच्या माध्यामातून नागरिकांना गंडा घालण्यात येत होता. हे रॅकेट पोलीस अधीक्षक नुरुल हसन यांच्या नेतृत्वाखाली उद्धवस्त करण्यात आलं. वर्धा पोलिसांनी बदरपूर साऊथ दिल्ली येथील उच्चभ्रु परिसरात सुरु असलेल्या दोन कॉलसेंटरवर कारवाई करुन फसवणुकीतील 89 हजार रुपये रोख तसेच मोबाईल, सिमकार्ड असा एकूण 2 लाख 35 हजार 900 रुपयांचा मुद्देमाल जप्त करुन दोघांना अटक केली. आकाश सुभाष सहानी (वय 30), राकेश रामप्रकाश राजपूत (वय 30) दोन्ही रा. बदरपूर दिल्ली अशी अटक आरोपींची नावे आहे.