३ वर्षापासून सावलीसारखा सोबत, सांगलीत शिव मल्हार क्रांती सेना, मारहाण करणारा पडळकरांचा तो गावगुंड कार्यकर्ता कोण?

आसिफ मुरसल, मुंबई : राज्य विधिमंडळाचे पावसाळी अधिवेशन सुरू असताना, राज्यातील जनतेच्या प्रश्नांवर चर्चा अपेक्षित असताना विरोधी पक्ष आणि सत्ताधारी आमदारांच्या कार्यकर्त्यांमध्ये तुंबळ हाणामारी झाली ते ही लोकशाहीचे मंदिर असलेल्या विधान भवनाच्या दारात... आताच्या काळात आमदार मंत्र्यांसोबत गुंड मवाली फिरतात इथपर्यंत राजकीय अध:पतन झाले आहे हे आता पूर्ण महाराष्ट्र जाणतो. परंतु विधान भवनात जिथे कायदे बनतात, तिथेच जर गुंड मवाल्यांना प्रवेश मिळायला लागला आणि रस्त्यावर जशी गुंडगिरी होते तशी मारहाण जर विधिमंडळाच्या द्वारात व्हायला लागली तर कसला कायदा आणि कसली सुव्यवस्था? असा प्रश्न सर्वसामान्य विचारत आहेत. 'अमृतकाळात' मुद्द्यांची लढाई आता गुद्द्यांवर येऊन पोहोचली आहे. ज्या विधिमंडळात अनेक थोर दिग्गजांची भाषणे झाली, त्यांच्या भाषणांनी सभागृहाची उंची वाढली, त्या सभागृहाच्या दारात आता एकमेकांना शिव्यांची लाखोली वाहिली जाते, हे दुर्दैव...