अजित पवारांना नडणारी महिला DYSP अंजना कृष्णा कोण आहे? ज्यांना दादा म्हणाले, तुमची एवढी हिम्मत?

मुंबई : भारतीय प्रशासन, पोलीस सेवेत जाऊन सामान्यांसाठी काम करायचे ध्येय उराशी बागळून देशातील लाखो उमेदवार तयारी करीत असतात. त्यातील फक्त हजार बाराशे उमेदवार यशस्वी होऊन प्रत्यक्ष सेवेत दाखल होतात. व्यवस्थेतील भ्रष्टाचारी लोकांविरुद्ध कारवाईचा बडगा उगारून सर्वसामान्य लोकांसाठी काम करण्याची शपथ अधिकारी प्रशिक्षण काळातच घेतात. मात्र सेवेत रूजू झाल्यानंतर त्यांचा सामना होतो कोडग्या आणि मग्रुर राजकारण्यांशी... (अर्थात काही अपवाद वगळून) हे लिहिण्याचे कारण म्हणजे अवैध उत्खननाचे काम थांबविण्यासाठी गेलेल्या महिला आयपीएस अधिकारी अंजना कृष्णा यांना ज्या थाटात राज्याचे उपमुख्यमंत्री अजित पवार यांनी फोन केला आणि 'तुमचं एवढं धाडस?' अशा हिणकस शब्दात त्यांच्या कर्तव्य कठोर स्वभावाचा अवमान केला, त्याची राज्यातच नाही तर देशात चर्चा होत आहे.