ते वक्तव्य बरोबर नाही, तुमचं चुकलंच, पवारसाहेबांची ही शिकवण नाही, पुतण्याने काकाला ठणकावलं

मत देणे हा तुमचा अधिकार आहे. मत दिले तर ठीक, नाहीतर मी अर्थ मंत्री आहेत. कुणाला कुठे किती निधी द्यायचा हा माझा अधिकार आहे, तुम्ही काट मारली तर मी ही काट मारेन, असे असे वक्तव्य अजित पवार यांनी बारामतीत बोलताना केले होते. त्यांच्या याच वक्तव्यावरून विरोधकांनी टीकेची झोड उठवली होती. आता युगेंद्र पवार यांनीही काकांचे वक्तव्य चुकीचेच असल्याचे म्हटले आहे.

अजित पवार यांचे विधान चुकीचे आहे. मला त्यांच्यावर फार काही बोलायचे नाही. मी सहसा त्यांच्याबरोबर बोलणं टाळतो. परंतु हे वक्तव्य अतिशय चुकीचे आहे. कारण तो निधी जनतेचा, लोकांच्या कराचा पैसा असतो. लोक आपल्याला निवडून देत असतात, त्यामुळे आपण पदावर बसत असतो. पवार साहेबांची ही शिकवण नाही, मला तरी त्यांचे विधान अजिबात पटलेले नाही, अशा शब्दात युगेंद्र पवार यांनी अजित पवार यांच्यावर निशाणा साधला.

शनिवारी औसा येथील भुईकोट किल्ल्याच्या परिसरात झालेल्या जाहीर सभेत अजित पवार म्हणाले की, मी माझी भूमिका मांडतो. विरोधकांनी काय बोलावं हा त्यांचा अधिकार आहे. निधी वाटपाच्या मुद्द्यावर केलेल्या आरोपाला मी प्रत्युत्तर उत्तर देत नाही. मी विकास कामाला महत्त्व देतो.