दीड टन वजन अन् 30 हजार रेडकांचा बाप, तब्बल 10 कोटींचा रेडा पाहिलात का? Video

गोलू 2 नावाच्या या रेड्याचे दर्शन कोल्हापुरातील पशुप्रेमींना एका कृषी प्रदर्शनात घेता येत आहे. हरियाणा येथील पानिपत येथील हा रेडा असून त्याचे मालक नरेंद्र सिंह यांनी त्याला कोल्हापुरात आणले. पद्मश्री पुरस्कार विजेते असलेल्या नरेंद्र सिंह यांच्या या गोलू 2 रेड्याची किंमत तब्बल 10 कोटी रुपये आहे. सहा वर्षांचा रेडा गोलू-2 हा त्यांच्या कुटुंबातील तिसरी पिढी आहे. या रेड्याच्या विशेष शरीरयष्टीमुळे सर्वत्र प्रसिद्ध असणाऱ्या आजोबांचे नाव गोलू ठेवण्यात आले होते. तर आता हा गोलू 2 हा देशभर आपले नाव गाजवत आहे. गोलू-2 चे वीर्य विकून तो दरवर्षी सुमारे 25 लाख रुपये कमावतो, असे गोलू 2 चे मालक नरेंद्र सिंह यांनी सांगितले.

10 कोटी रुपयांच्या या रेड्याच्या आहारात सुक्या मेव्याचा समावेश असतो. त्याचे वजन सुमारे दीड टन आहे. त्याची लांबी 14 फूट तर उंची सुमारे 6 फूट आहे. गोलू 2 ला दररोज सुमारे 35 किलो कोरडा आणि हिरवा चारा आणि हरभरा लागतो. त्याच्या आहारात 7 ते 8 किलो गुळाचाही समावेश असतो. त्याला अधूनमधून दूध, तूपही दिले जाते. एकूणच त्याच्या खुराकावर महिन्याला सुमारे 30 ते 35 हजार रुपये खर्च येतो, असे मालक नरेंद्र सिंह यांनी सांगितले आहे.

गोलू 2 या मुऱ्हा जातीच्या रेड्याच्या शुक्राणूंची विक्री मालक नरेंद्र सिंह करतात. गोलू 2 च्या शुक्राणूंना फक्त देशातच नाही, तर परदेशातही मोठी मागणी आहे. नरेंद्र सिंह फक्त शेतकरी आणि पशुपालकांना शुक्राणू पुरवतात. त्यामुळेच गोलू 2 हा आजवर 30 हजार म्हशी आणि रेड्यांचा बाप आहे.

गोलू 2 रेड्याचे मालक नरेंद्र सिंह हे हरियाणाच्या पानिपत जिल्ह्यातील दिदवारी गावचे रहिवासी आहेत. त्यांना पशुपालन क्षेत्रातील त्यांच्या अतुलनीय योगदानाबद्दल पद्मश्री पुरस्कार मिळाला आहे. 2019 मध्ये त्यांना हा पद्मश्री पुरस्कार बहाल करण्यात आला होता. आजही ते इतर शेतकऱ्यांना पशुपालना संदर्भात प्रोत्साहन आणि मार्गदर्शन देत असतात.