दुष्काळी माणमध्ये AC पोल्ट्री फार्म, दोन भाऊ मिळून करतायत लाखोंची कमाई

सातारा : सातारा जिल्ह्यातील माण तालुका म्हटलं की सदैव दुष्काळी तालुका म्हणूनच या तालुक्याची ओळख सांगितली जाते. हा तालुका कायमचा दुष्काळी तालुका म्हणून संपूर्ण महाराष्ट्रभर चर्चिला जातो. या तालुक्यात काही महिने पिण्यासाठी पाणी मिळत नाही अन् शेताला देखील पाणी मिळत नाही. त्यामुळे या भागात शेतीबरोबर कुक्कुटपालन, शेळीपालन आणि दुग्ध व्यवसाय केला जातो. याच दुष्काळावर मात करत दुष्काळी भागातील दीडवाघवाडी या छोट्याशा गावात दीडवाघ बंधूंनी AC पोल्ट्रीचा व्यवसाय सुरू केला आहे. या AC पोल्ट्री व्यवसायामधून हे दोन्ही बंधू महिन्याला लाखो रुपये कमवत आहेत.

माण तालुक्यातील दीडगाववाडी या छोट्या गावात महेश आणि सुहास दीडवाघ हे बंधू राहतात. आई आणि वडीला सोबत हे दोघे बंधू पूर्वी मुंबई येथे राहायचे. हे दोन्ही भावंड मुंबईमध्येच मोठी झाली. महेश याने केमिकल डिप्लोमा याचे शिक्षण घेतले मात्र नोकरी करण्याऐवजी आपला स्वतःचा व्यवसाय सुरू करण्याचा निर्णय घेतला आणि मुंबई सोडून गावाला आले. वडिलांचे 22 एकर वडिलोपार्जित शेती होती पण दुष्काळी भागात शेतीमधून अपेक्षित उत्पन्न मिळण्याची शाश्वती नव्हती. कमी पाण्यात माळरान जमिनीवर नेमकं काय व्यवसाय सुरू करायचं याचे कोडे या दोन्ही भावांना पडले होते. त्यांनी शेळीपालन दुग्ध व्यवसाय कुक्कुटपालन यांसारख्या अनेक शेतीपूरक व्यवसाय याची पाहणी केली. त्यानंतर त्यांनी कमी पाण्यात पोल्ट्री हा चांगला पर्याय होऊ शकतो ते त्यांनी जाणले फलटण येथे करार पद्धतीचा पोल्ट्री व्यवसाय पाहण्यात आला. त्याची सर्व तांत्रिक माहिती आणि आर्थिक गणिते समजून घेत त्यांनी आपल्या रानामध्ये पोल्ट्री सुरू केली.