Women Success Story: पतीच्या निधनानंतर ती खचली नाही, सुरू केला हँडमेड व्यवसाय, नाशिकच्या अपर्णा यांची कहाणी, Video

त्या दिवशी अपर्णा यांच्या सुखी संसाराला जणू नजरच लागली. या दिवशी अपर्णा यांच्या पतीचे अचानकच दुर्दैवी निधन झाले आणि त्या पूर्णपणे एकट्या पडल्या. नवऱ्याचे अचानक जाणे हे त्यांना कुठेतरी कल्पनेच्या पलीकडचे होते. त्यांना हे दुःख सहन होत नव्हते. अचानक मिळालेल्या या धक्क्यामुळे अपर्णा या संपूर्ण खचून गेल्या. त्यांची मानसिक स्थिती सर्वस्वी विस्कटून गेली. काय होत आहे काय नाही हे समजत नव्हते. त्याच दरम्यान त्यांना एक आजार झाल्याचे त्यांनी लोकल 18 सोबत बोलताना सांगितले. 

संपूर्ण शरीराचा एक भाग निकामी झाला. स्वतःचे मन स्वतःच्या ताब्यात नसल्याने अनेक अडचणी येत गेल्या. त्या वेळी त्या आपल्या माहेरी नाशिक येथे आल्या. बरेच औषधोपचार त्यांना घ्यावे लागले. तरी देखील त्या दुःख विसरू शकत नाहीत हे त्यांच्या घरच्या मंडळींना समजले. आपली मुलगी कुठेतरी अडकून न राहता तिचे दुःख कमी होईल याकरता आई आणि भावाने मिळून मदत केली.

भावाचे आधीपासून शोभेच्या वस्तू बनवण्याचा छंद होता आणि अपर्णा देखील आधीपासून कला क्षेत्रात असल्याने घरच्यांनी त्यांना हँडमेड वस्तूंचे दुकान सुरू करून दिले. ज्यामुळे त्या इतरांशी गप्पा मारतील आणि आनंदी राहतील. त्यांनी देखील व्यवसाय सुरू करण्याचा निर्णय घेतला.

आपले पती आपल्यासोबत नाहीत परंतु त्यांचा सहवास आणि त्यांचे नाव नेहमी ऐकू यावे याकरता त्यांनी आपल्या या दुकानाला देखील वैभव आर्ट्स असे नाव दिले. आज अपर्णा या एक वर्षापासून आपले हे दुकान सांभाळत असतात. त्या त्यांच्या हाताने या दुकानातील सर्व वस्तू बनवून विक्री करत असतात. इतक्या मोठ्या दुःखाचा डोंगर सावरून आज त्या नाशिकमध्ये आपल्या या कामामुळे ओळखल्या जात आहेत. तुम्हाला देखील यांच्या या वस्तू बघायच्या असतील तर तुम्ही देखील त्यांना भेट देऊ शकता.