Success Story : घरातून सुरू केला 'अंबिका मसाले'; आता लोखोंची कमाई, रीना मालोदे यांची प्रेरणादायी कहाणी

छत्रपती संभाजीनगर : "व्यवसाय म्हणजे बाहेर जाऊनच करता येतो," अशी आपल्याकडे अनेकांची धारणा असते. मात्र छत्रपती संभाजीनगर येथील रीना मालोदे यांनी ही मानसिकता बदलत स्वतःच्या घरातूनच मसाल्यांचा व्यवसाय सुरू करून आर्थिक स्वावलंबनाचा आदर्श घालून दिला आहे.

रीना यांनी पदवीपर्यंत शिक्षण घेतले असून त्या दोन मुलांच्या आई आहेत. त्यांचे पती स्वतःचा व्यवसाय सांभाळतात, पण रीना यांनाही काहीतरी स्वतःचे सुरू करायचे होते. मात्र, सासूबाई आजारी असल्यामुळे त्यांना घराबाहेर जाऊन व्यवसाय करणे शक्य नव्हते. याच परिस्थितीत, त्यांच्या सासूबाईंनी त्यांना घरातूनच मसाल्यांचा व्यवसाय सुरू करण्याचा सल्ला दिला.

रीना यांनी आपल्या आई आणि सासूबाईंकडून मसाले तयार करण्याच्या पारंपरिक रेसिपी शिकल्या. त्यांनी 'अंबिका मसाले' या नावाने स्वतःचा ब्रँड तयार केला. सुरुवातीला त्यांनी मैत्रिणींना, शेजाऱ्यांना आणि नातेवाईकांना मसाल्याचे नमुने दिले. त्यातून त्यांना पहिल्या काही ऑर्डर्स मिळाल्या आणि हळूहळू व्यवसायाचा विस्तार सुरू झाला.

स्टॉलवर येणारे ग्राहक आधी सॅम्पल मसाले घेऊन जायचे आणि चव आवडल्यावर परत ऑर्डर द्यायचे. या पद्धतीने ग्राहकांचा विश्वास आणि व्यवसायाची ओळख निर्माण झाली.