सारखा टोल भरायची कटकट नाही, सरकार लवकरच आणणार स्मार्ट टोल टॅक्स कार्ड!

राष्ट्रीय महामार्ग प्राधिकरणाच्या टोल प्लाझाचा वापर करावा लागणाऱ्या वाहनचालकांसाठी चांगली बातमी आहे. मंथली टोल टॅक्स स्मार्ट कार्ड सुरू करण्याचा विचार केंद्र सरकार करत आहे. ही योजना संपूर्ण भारतभरात लागू करण्याचा केंद्रीय रस्ते, परिवहन आणि महामार्ग मंत्री नितीन गडकरी यांचा विचार आहे. हे स्मार्ट कार्ड देशातल्या सर्व टोल प्लाझांवर स्वीकारलं जाईल आणि कार्डधारकांना टोल टॅक्समध्ये सूटही मिळेल. सरकारच्या या उपक्रमामुळे खासकरून कमर्शियल वाहनं आणि एक्स्प्रेस-वेवरून वारंवार प्रवास करावा लागणाऱ्या व्यक्तींना मोठा दिलासा मिळू शकतो. ही योजना लवकर लागू करण्याच्या दृष्टीने नितीन गडकरी गांभीर्याने विचार करत असल्याचं सूत्रांचं म्हणणं आहे.