पैसा तयार ठेवा! बजेट काही तासांवर मार्केटच्या किंगला 'ग्रीन सिग्नल'; कॅपिटल मार्केटमध्ये मोठी हालचाल, NSEमधील इनसाइड स्टोरी

Published by:Jaykrishna Nair

Last Updated:Jan 31, 2026 10:39 PM IST

NSE News: नॅशनल स्टॉक एक्सचेंजचा बहुप्रतिक्षित आयपीओ अखेर प्रत्यक्षात येण्याच्या दिशेने वाटचाल करू लागला आहे. 10 वर्षांनंतर सेबीकडून मंजुरी मिळाल्याने एनएसई लवकरच डीआरएचपी दाखल करण्याच्या तयारीत आहे.

नवी दिल्ली: नॅशनल स्टॉक एक्सचेंज (NSE) चा बहुप्रतिक्षित आयपीओ आता प्रत्यक्षात येण्याच्या दिशेने एक महत्त्वाचे पाऊल पुढे टाकत आहे. एनएसईचे मॅनेजिंग डायरेक्टर आणि मुख्य कार्यकारी अधिकारी (CEO) आशीष चौहान यांनी शनिवारी याबाबत महत्त्वाची माहिती दिली. आयपीओसाठी आवश्यक असलेला ड्राफ्ट रेड हेरिंग प्रॉस्पेक्टस (DRHP) तयार करण्यास साधारणपणे 3 ते 4 महिन्यांचा कालावधी लागेल, असे त्यांनी स्पष्ट केले. कोणत्याही आयपीओ प्रक्रियेमधील डीआरएचपी हा अत्यंत महत्त्वाचा दस्तावेज मानला जातो.

आशीष चौहान यांनी जवळपास 10 वर्षांच्या विलंबानंतर आयपीओ प्रक्रिया पुढे नेण्यासाठी मंजुरी दिल्याबद्दल बाजार नियामक सेबीचे (SEBI) आभार मानले. त्यांनी सांगितले की, गेल्या दहा वर्षांनंतर सेबीने एनएसईचा आयपीओ सुरू करण्यास संमती दिली आहे. ही एनएसईसाठी अत्यंत महत्त्वाची बाब असून, यासाठी आम्ही सेबीचे ऋणी आहोत, असेही चौहान म्हणाले. डीआरएचपी तयार करण्याची प्रक्रिया सुरू असतानाच आयपीओमधील ‘ऑफर फॉर सेल’ (OFS) या भागावरही समांतरपणे काम केले जाईल, अशी माहिती त्यांनी दिली.

एनएसईकडे सध्या 1.91 लाख भागधारक

सध्या नॅशनल स्टॉक एक्सचेंजकडे सुमारे 1.91 लाख विद्यमान भागधारक आहेत. जे भागधारक ऑफर फॉर सेल (OFS) मार्गे आपले शेअर्स विकण्यास पात्र आणि इच्छुक असतील, त्यांना या प्रक्रियेत सहभागी होता येणार आहे. त्यामुळे आयपीओच्या माध्यमातून मोठ्या प्रमाणावर भागधारकांना लिक्विडिटी मिळण्याची शक्यता आहे.

10 वर्षांनंतर सेबीकडून मिळालेली हिरवी झेंडी

सेबीकडून मिळालेली ही मंजुरी एनएसईसाठी एक मोठी आणि निर्णायक उपलब्धी मानली जात आहे. एनएसईचा आयपीओ गेल्या दहा वर्षांहून अधिक काळ रखडलेला होता. यामागे काही गंभीर नियामक अडचणी होत्या. यामध्ये गव्हर्नन्सशी संबंधित त्रुटी आणि को-लोकेशन प्रकरणाचा समावेश होता. या सर्व मुद्द्यांवर तोडगा निघाल्यानंतर आणि सेबीकडून हिरवी झेंडी मिळाल्यानंतर आता एनएसई आपल्या आयपीओच्या दिशेने ठामपणे पुढे सरकणार आहे.

वॅल्यू क्रिएशनचा नवा टप्पा

यापूर्वी एनएसईचे चेअरमन श्रीनिवास इनजेटी यांनी सेबीच्या मंजुरीला एक्सचेंजच्या ग्रोथ जर्नीमधील एक महत्त्वाचा टप्पा असल्याचे म्हटले होते. त्यांच्या मते, या निर्णयामुळे एनएसईच्या भागधारकांसाठी नव्या वॅल्यू क्रिएशनचे दरवाजे खुले होतील, तसेच भारताच्या कॅपिटल मार्केटला अधिक मजबूत करण्यामध्ये एनएसईची भूमिका किती महत्त्वाची आहे, यावरचा विश्वासही यामुळे अधोरेखित होतो.

2016 पासून सुरू असलेला प्रयत्न अखेर फळाला येणार

एनएसई 2016 पासून आपल्या शेअर्सचे शेअर बाजारात लिस्टिंग करण्याचा प्रयत्न करत आहे. मात्र विविध चौकशी आणि नियामक कारणांमुळे ही प्रक्रिया वारंवार पुढे ढकलली गेली. अलीकडेच सेबीचे चेअरमन तुहिन कांता पांडे यांनी एनएसईच्या आयपीओला लवकरच मंजुरी मिळू शकते, असे संकेत दिले होते. त्यानंतर बाजाराशी संबंधित वर्तुळात आशा आणि अपेक्षा वाढल्या होत्या. आता प्रत्यक्षात सेबीकडून मंजुरी मिळाल्याने एनएसईचा आयपीओ लवकरच बाजारात येण्याची शक्यता अधिक बळावली आहे.

view comments

Location :

Mumbai,Maharashtra

First Published :

Jan 31, 2026 10:39 PM IST

पैसा तयार ठेवा! बजेट काही तासांवर मार्केटच्या किंगला 'ग्रीन सिग्नल'; कॅपिटल मार्केटमध्ये मोठी हालचाल, NSEमधील इनसाइड स्टोरी