Mumbai : जीएसटी माहितीचा 'असा' केला गैरवापर; सीए मित्रानेच मित्राच्या नकळत केले बेकायदेशीर व्यवहार

मित्राच्या नावावर उघडलेल्या जीएसटी खात्याचा गैरवापर करून मोठ्या आर्थिक फसवणुकीचा प्रकार उघडकीस आला आहे. या प्रकरणी ट्रॉम्बे पोलिसांनी लखनऊ येथील चार्टर्ड अकाउंटंट रशीद रईस सिद्दीकी याच्याविरोधात गुन्हा दाखल केला आहे. या गैरव्यवहारामुळे एका व्यक्तीवर तब्बल 4.69 कोटी रुपयांची कर भरण्याची जबाबदारी पडली.

मिळालेल्या माहितीनुसार, तक्रार दार नसीर हुसेन शेख (वय 36) हे बीकेसीतील एका खासगी कंपनीत आयटी सपोर्ट एक्झिक्युटिव्ह म्हणून काम करतात. ते ट्रॉम्बेतील चिता कॅम्प परिसरात राहतात शिवाय त्यांचे एक मोबाईल दुकान असून ते त्यांचे भाऊ चालवतात.

फेब्रुवारी 2020 मध्ये जीएसटी विभागाकडून नसीर यांना थकीत रकमेची नोटीस मिळाली. पुढील तपासात कोणतेही व्यवहार आढळले नसतानाही 2024 मध्ये त्यांच्यावर 4.69 कोटी रुपयांचा दंड लावण्यात आला. अखेर फसवणूक झाल्याचे स्पष्ट झाल्यानंतर नसीर यांनी पोलिसांकडे तक्रार दाखल केली.