Mumbai : सलीम शेखचा 252 कोटींचा 'ड्रग्ज बॉम्ब', बॉलीवूड कनेक्शनने खळबळ, दिग्गज सेलिब्रेटींना MD सप्लाय!

या प्रकरणातील मुख्य आरोपी सलीम शेख हा ड्रग्ज तस्कर सलीम डोलाचा जवळचा सहकारी असल्याचा आरोप आहे. त्याने पोलीस तपासादरम्यान अनेक दावे केले आहेत, ज्याचा पोलिस रिमांड रिपोर्टमध्येही उल्लेख आहे. रिमांड कॉपीनुसार, आरोपी सलीम शेखने भारतात आणि परदेशात अनेक ड्रग्ज पार्ट्या आयोजित केल्या होत्या. त्याने दावा केला की अनेक प्रसिद्ध बॉलीवूड अभिनेते आणि अभिनेत्री तसेच इतर हाय-प्रोफाइल व्यक्ती या पार्ट्यांमध्ये सहभागी झाल्या होत्या. पोलीस सलीमच्या दाव्यांमागील सत्य तपासत आहेत. या प्रकरणात अद्याप कोणावरही आरोप लावण्यात आलेला नाही, असं पोलिसांनी सांगितलं आहे.

फेब्रुवारी 2024 मध्ये एका महिलेला 741 ग्रॅम एमडी ड्रग्जसह पकडण्यात आले तेव्हा हे संपूर्ण प्रकरण उघडकीस आले. चौकशीदरम्यान तिने सांगली येथील एका केमिकल फॅक्टरीचे नाव उघड केले. पोलीस सांगलीला पोहोचले तेव्हा त्यांना सुमारे 245 कोटी रुपयांचे 122.5 किलो ड्रग्ज आणि केमिकल्स सापडले. त्यानंतर, पोलिसांना कळले की नेटवर्कमधील अनेक प्रमुख आरोपी परदेशात पळून गेले आहेत. इंटरपोलच्या मदतीने, ताहिर डोला (सलीम डोलाचा मुलगा) आणि कुब्बावाला (त्याचा पुतण्या) यांना युएईमध्ये अटक करण्यात आली. आता, सलीम शेखलाही दुबईहून मुंबईत आणण्यात आले आहे.

पोलीस सलीम शेखला या संपूर्ण ड्रग्ज नेटवर्कचा "कोऑर्डिनेटर" मानत आहेत. पोलिसांच्या मते, त्याने महाराष्ट्र, गुजरात, मध्य प्रदेश, राजस्थान आणि तेलंगणासारख्या राज्यांमध्ये पसरलेल्या ड्रग्ज नेटवर्कचे व्यवस्थापन केले. या नेटवर्कचा मास्टरमाइंड फरार ड्रग्ज लॉर्ड सलीम डोला आहे, जो सध्या तुर्कीमध्ये असल्याचे मानले जाते. सलीम शेख त्याचा जवळचा आणि विश्वासू सहकारी होता.

ड्रग्ज तस्करी प्रकरणात पोलिसांनी मुंबई सेंट्रल स्टेशनजवळ आरोपी शाहरुख मोहम्मद शफी शेखला अटक केली. त्याच्याकडून 995 ग्रॅम एमडी (मेफेड्रोन) जप्त करण्यात आले, ज्याची किंमत अंदाजे ₹1.99 कोटी आहे. इलेक्ट्रॉनिक वजनकाटे, ₹1.25 लाख रोख, अनेक मोबाईल फोन, पासपोर्ट, आधार कार्ड, पॅन कार्ड आणि इतर कागदपत्रे देखील जप्त करण्यात आली.

तपासात असेही उघड झाले की आरोपी बनावट कागदपत्रांचा वापर करून पासपोर्ट मिळवून परदेशात पळून जाण्याचा किंवा तेथे ड्रग्ज पुरवठादारांशी संपर्क साधण्याचा विचार करत होते. मोहम्मद सलीम शेख आणि शरीब अन्सारी यांनी मुंबईच्या पत्त्यांचा वापर करून अनेक ड्रग्ज तस्करांना बनावट पासपोर्ट मिळवण्यात मदत केली. या टोळीचे ड्रग्ज उत्पादन केंद्र सांगली येथे असल्याचे वृत्त आहे, जिथून देशभरात एमडी ड्रग्जचा पुरवठा केला जात असे. आरोपी सलीम शेखने केलेल्या सर्व दाव्यांचीही चौकशी केली जात आहे.