Goregaon Mulund Link Road : गोरेगाव- मुलुंड लिंक रोड खणण्यासाठी ऑस्ट्रेलियाहून आणली मशीन, केव्हापासून होणार कामाचा श्रीगणेशा?

गोरेगाव- मुलुंड लिंक रोडचं काम सध्या सुरू आहे. हे महाकाय बोगदे खणण्यासाठी पहिल्या महाकाय टीबीएम मशीनचे (टनेल बोअरिंग मशीन) सुटे भाग दाखल झाले आहेत. तर, दुसऱ्या टीबीएम मशीनचे सुटे भाग येत्या नोव्हेंबरपर्यंत दाखल होतील. साधारण चार मजली उंच अशा महाकाय टीबीएम (टनेल बोअरिंग मशीन) मशीनने बोगदा खणण्याचे काम पुढच्या वर्षाच्या पावसाळ्याआधीच काम सुरू करण्याचे मानस मुंबई महापालिकेचे आहे. मुंबईतील पूर्व आणि पश्चिम उपनगरांना जोडणारा गोरेगाव- मुलुंड लिंक रोड तब्बल 12.20 किमीचा हा महत्वाकांक्षी प्रकल्प हाती घेण्यात आला आहे.

या प्रकल्पांतर्गत पश्चिम उपनगरामध्ये गोरेगावमध्ये असणाऱ्या दादासाहेब फाळके चित्रनगरी ते पूर्व उपनगरांतील मुलुंड येथील खिंडीपाडापर्यंत जुळा व भूमिगत बोगदा बांधण्यात येणार आहे. एकमेकांना समांतर असलेल्या सारख्या अंतराचे प्रत्येकी ४.७० किमीचे असणार आहेत. हा बोगदा संजय गांधी राष्ट्रीय अभयारण्याच्या डोंगराखाली पूर्णपणे जमिनीखालून जाणार आहे. या भूमिगत बोगद्यामध्ये शिरण्यासाठी चित्रनगरी परिसरामध्ये पेटी बोगदाही बांधण्यात येणार आहे. या महत्त्वाच्या कामासाठी अत्याधुनिक तंत्रज्ञानाची मदत घेऊन तो पूर्ण करण्यात येणार आहे.

बोगद्याचे खोदकाम करण्यासाठी ऑस्ट्रेलियन कंपनीकडून दोन महाकाय टीवीएम मशीन घेण्यात आले आहेत. मशीन जोडून प्रथम त्याची सर्व तपासणी करण्यासाठी चार ते पाच महिन्यांचा कालावधी लागेल आणि ऑगस्ट २०२६ पासून बोगद्याच्या कामाला सुरुवात करण्याचे कंत्राटदाराचे नियोजन आहे. तरीही पावसाळ्याआधी काम सुरू करण्याचे नियोजन असल्याची माहिती मुंबई महापालिकेचे अतिरिक्त आयुक्त (प्रकल्प) अभिजीत बांगर यांनी दिली.