Mumbai : ज्यांनी वाचवायचं त्यांनीच केलं कांड, 16 वर्षीय मुलीसोबत केलं भयंकर कृत्य; नशामुक्ती केंद्राचा काळा चेहरा उघड

मिळालेल्या माहितीनुसार पीडित मुलगी मानखुर्द परिसरातील रहिवासी आहे. तिला नशामुक्तीसाठी मालवणी येथील एका केंद्रात दाखल करण्यात आले होते. मात्र ज्या ठिकाणी तिची काळजी घेणे अपेक्षित होते त्याच ठिकाणी केंद्राच्या संचालकाने जानेवारी 2024 ते फेब्रुवारी 2025 या कालावधीत तिच्यावर वारंवार लैंगिक अत्याचार केले. इतकेच नव्हे तर संचालकाने पीडितेच्या मैत्रिणीलाही आपल्या वासनेचा शिकार बनवले.

या अत्याचारातून पीडित मुलगी गरोदर राहिली. ही बाब केंद्राच्या महिला संचालिकेच्या लक्षात आली तेव्हा तिने पोलिसांना कळवण्याऐवजी किंवा मदत करण्याऐवजी पीडितेला विविध औषधे देऊन तिचा बेकायदेशीरपणे गर्भपात घडवून आणला. या भीषण कृत्यात केंद्रातील इतर दोन कर्मचाऱ्यांनीही साथ दिली. त्यांनी पीडितेशी अश्लील चाळे केले आणि पुरावे नष्ट करण्याच्या उद्देशाने तिला जबरदस्तीने आंघोळ करण्यास भाग पाडले.