Badlapur case: तुमची बहीण खरंच लाडकी असेल तर..! मुख्यमंत्र्यांच्या जिल्ह्यातच कायदा धाब्यावर कसा - राज ठाकरे

आज सरकार 'लाडकी बहीण' योजनेच्याद्वारे स्वतःच कौतुक करून घेण्यात मग्न आहे, पण जर तुमची बहीण खरंच लाडकी असेल तर तिच्यावर अशी वेळ येऊ नये आणि दुर्दैवाने आलीच तर तिला न्याय मिळेल हे पाहणं हे पहिलं कर्तव्य नाही का ? जनतेच्या पैशातून, बहिणींना पैसे देऊन स्वतःचं ब्रॅण्डिंग करण्यापेक्षा ती सुरक्षित आहे, ही भावना जरी निर्माण केलीत तरी खूप आहे.

माझ्या पक्षाच्या महिला पदाधिकाऱ्यांमुळे हा विषय आज समोर आलाय याचा मला अभिमान आहे. पण मुळात असे प्रकार घडू नयेत यासाठी कडक कायदे आणि त्याची अंमलबजावणी होणं गरजेचं आहे, असे राज ठाकरे यांनी त्यांच्या पोस्टमध्ये म्हटले आहे.

दरम्यान, बदलापूरमध्ये अल्पवयीन मुलींवर अत्याचार करणाऱ्या आरोपी अक्षय शिंदे याला आज न्यायालयात हजर करण्यात आले. कल्याण कोर्टाने अक्षय शिंदे याला 25 ऑगस्टपर्यंत पोलीस कोठडी सुनावली. त्याने असे आणखी गुन्हे केल्याचा संशय पोलिसांना आहे. त्याने हे कृत्य कसं केलं, काय सांगून तो मुलींना सोबत न्यायचा या गोष्टींचा तपास करायचा असल्याचं सांगत पोलिसांनी त्याची कोठडी मागितली. आरोपीवर पोक्सो अंतर्गत गुन्हा दाखल करण्यात आला आहे.