लालू प्रसाद यादव यांचा कठोर निर्णय; मोठा मुलगा तेज प्रतापची पक्षातून हकालपट्टी, कुटुंबात देखील स्थान नाही

हा संपूर्ण वाद शनिवारी तेज प्रताप यादव यांच्या सोशल मीडिया अकाउंटवर एक पोस्ट व्हायरल झाल्यानंतर वाढला. या पोस्टमध्ये त्यांनी आपल्या खाजगी आयुष्याबद्दल काही गोष्टी लिहिल्या होत्या आणि एका युवतीसोबतचा फोटो शेअर केला होता. तेज प्रताप यादव यांनी लिहिले होते, मी तेज प्रताप यादव आणि माझ्यासोबत या चित्रात जी दिसत आहे, तिचे नाव अनुष्का यादव आहे. आम्ही दोघे गेल्या 12 वर्षांपासून एकमेकांना ओळखतो आणि प्रेम करतो. आम्ही गेल्या 12 वर्षांपासून रिलेशनशिपमध्ये आहोत. मला ही गोष्ट तुम्हाला खूप दिवसांपासून सांगायची होती, पण कशी सांगू हे समजत नव्हते... म्हणून आज या पोस्टद्वारे मी माझ्या मनातील गोष्ट तुमच्यासमोर मांडत आहे. आशा आहे की तुम्ही माझ्या भावना समजून घ्याल.

मात्र काही वेळानंतर ही पोस्ट डिलीट करण्यात आली. त्यानंतर तेज प्रताप यादव यांनी या पोस्टला अफवा ठरवत, 'एआय' (AI) चा वापर करून चुकीचे संपादन करून ही पोस्ट टाकण्यात आली आहे आणि हे त्यांच्या कुटुंबाला बदनाम करण्याचा प्रयत्न आहे, असे स्पष्टीकरण दिले. तेज प्रताप यादव यांनी आपल्या पोस्टमध्ये लिहिले होते, माझे सोशल मीडिया प्लॅटफॉर्म हॅक करून आणि माझ्या प्रतिमांचा 'एआय' वापरून चुकीच्या पद्धतीने संपादन करून मला आणि माझ्या कुटुंबियांना त्रास दिला जात आहे आणि बदनाम केले जात आहे. मी माझ्या हितचिंतकांना आणि फॉलोअर्सना विनंती करतो की त्यांनी सावध राहावे आणि कोणत्याही अफवांवर विश्वास ठेवू नये. परंतु हा वाद पक्ष आणि कुटुंबात वाढतच गेला आणि आता त्यांना राजद मधून काढण्यात आले आहे.

लालू यादव पुढे म्हणाले, त्याच्या स्वतःच्या खाजगी जीवनातील चांगले-वाईट आणि गुण-दोष पाहण्यासाठी तो स्वतः सक्षम आहे. त्याच्याशी जे कोणी संबंध ठेवतील, त्यांनी स्वविवेकबुद्धीने निर्णय घ्यावा. सार्वजनिक जीवनात मी नेहमीच लोकलाजेचा पुरस्कर्ता राहिलो आहे. कुटुंबातील आज्ञाधारक सदस्यांनी सार्वजनिक जीवनात याच विचाराचा स्वीकार करून त्याचे अनुसरण केले आहे. धन्यवाद.