भाजीपाला विकणाऱ्याची शेअर मार्केटमध्ये एन्ट्री! 40 कोटींचे भांडवल, शेअरची किंमत किती?

अहमदाबाद येथे मुख्यालय असलेली भाजीपाला व्यापार क्षेत्रातील स्टॅनबिक ॲग्रो ही कंपनी आता शेअर बाजारात पाऊल ठेवण्याच्या तयारीत आहे. बीएसईच्या एसएमई (लघु व मध्यम उद्योग) प्लॅटफॉर्मवर कंपनीचा आयपीओ सादर करण्यात आला असून, या माध्यमातून सुमारे 28 कोटी रुपयांचा निधी उभारण्याचा कंपनीचा मानस आहे. या इश्यूद्वारे स्टॅनबिक ॲग्रो सुमारे 40 कोटी रुपयांचे बाजार भांडवल गाठण्याचे लक्ष्य ठेवत आहे. भाजीपाला व्यापारासारख्या पारंपरिक व्यवसायातून आलेली कंपनी थेट शेअर बाजारात येत असल्याने गुंतवणूकदारांमध्ये तसेच सोशल मीडियावर या आयपीओची मोठी चर्चा सुरू आहे.

स्टॅनबिक ॲग्रो या आयपीओअंतर्गत 30 रुपये प्रति शेअर या किमतीने सुमारे 41 लाख नवीन शेअर्स जारी करणार आहे. या शेअर्सच्या विक्रीतून कंपनी अंदाजे 12.3 कोटी रुपये उभारणार असून, उर्वरित निधी इतर मार्गांनी गोळा केला जाणार असल्याची माहिती समोर आली आहे. कमी किंमतीतील शेअर असल्यामुळे लघुगुंतवणूकदारांचा कल या आयपीओकडे अधिक दिसून येत आहे. मात्र एसएमई सेगमेंटमधील शेअर्समध्ये जोखीम तुलनेने जास्त असल्याने अनेक गुंतवणूकदार सावध भूमिका घेत आहेत.

याआधी दिल्लीतील केवळ दोन शोरूम असलेल्या दुचाकी विक्रेता कंपनी रिसोर्सफुल ऑटोने ऑगस्ट 2024 मध्ये बीएसई एसएमई प्लॅटफॉर्मवरून सुमारे 12 कोटी रुपये उभारले होते. त्या वेळी 117 रुपये दराने जारी झालेला हा शेअर सध्या सुमारे 53 रुपयांपर्यंत खाली आला आहे. बीएसईच्या माहितीनुसार, स्टॅनबिक ॲग्रोचा आयपीओ 12 डिसेंबर रोजी खुला झाला असून 16 डिसेंबर रोजी बंद होणार आहे. इश्यूच्या पहिल्या दिवशी सुमारे 5 टक्के सदस्यता मिळाल्याचे समोर आले आहे. हा शेअर 19 डिसेंबर रोजी बीएसई एसएमई प्लॅटफॉर्मवर सूचीबद्ध होण्याची शक्यता वर्तवली जात आहे.

कंपनीच्या आर्थिक कामगिरीकडे पाहिले असता, स्टॅनबिक ॲग्रोने गेल्या काही वर्षांत वेगाने प्रगती केली असल्याचे दिसून येते. आर्थिक वर्ष 2024 मध्ये कंपनीचा महसूल सुमारे 33 टक्क्यांनी वाढून 26.6 कोटी रुपयांवर पोहोचला होता. त्यानंतर आर्थिक वर्ष 2025 मध्ये हा महसूल जवळपास दुप्पट वाढून 52.5 कोटी रुपयांपर्यंत गेला आहे.

महसूलवाढीचा हा वेग गुंतवणूकदारांसाठी सकारात्मक संकेत मानला जात असला तरी, भविष्यातील नफाक्षमता, बाजारातील स्पर्धा आणि व्यवसायाचा विस्तार या बाबी निर्णायक ठरणार आहेत.