'मी असं आयुष्य जगू शकत नाही', Ex पतीच्या पुन्हा जवळ आली चारू असोपा, ट्रोलर्सना सणसणीत उत्तर

मुंबई: टीव्ही अभिनेत्री चारू असोपा आणि तिचा एक्स-हसबंड राजीव सेन यांचे नाते नेहमीच चर्चेत असते. २०२३ मध्ये त्यांचा घटस्फोट झाला असला तरी, गणेश चतुर्थी आणि दुर्गा पूजेसारखे सण त्यांनी नुकतेच एकत्र साजरे केले.

काही आठवड्यांपूर्वी एकमेकांवर सार्वजनिकरित्या टीका करणारे हे दोघे आता ज्या प्रकारे एकत्र वेळ घालवत आहेत, त्यामुळे चाहत्यांमध्ये मोठा गोंधळ उडाला आहे. या वाढत्या जवळीकतेवर अखेर चारू असोपाने मौन सोडले आहे.

चारू असोपाने नुकताच तिच्या यूट्यूब चॅनलवर एक व्हिडीओ शेअर केला, ज्यात तिने राजीवसोबत वेळ घालवल्याबद्दल मिळत असलेल्या नकारात्मक प्रतिक्रियांबद्दल भाष्य केले. आम्ही पुन्हा एकत्र आलो आहोत की नाही, हे तिने स्पष्ट केले नाही, पण सध्या सगळे आनंदी आहेत, असे सांगितले.

चारू म्हणाली, "सर्वात पहिली गोष्ट म्हणजे मी आनंदी आहे, राजीव आनंदी आहे, जियाना आनंदी आहे - सगळे आनंदी आहेत. आम्ही सगळे आपापसात बोलत आहोत. आम्ही नेहमीप्रमाणे एकत्र आहोत, त्यामुळे 'मी परत का आली' किंवा 'का गेली' याचा तुम्ही जास्त विचार करू नका."

चारू असोपाने स्पष्ट केले की, ती लोकांच्या मतावर आपले आयुष्य जगू शकत नाही. ती म्हणाली, "प्रत्येक नाण्याला दोन बाजू असतात. काही लोकांना एक गोष्ट आवडते, तर काही लोकांना दुसरी. पण, लोक काय विचार करतात, यावर मी माझे आयुष्य जगू शकत नाही. मला स्वतःचा आणि माझ्या मुलीचा विचार करायचा आहे. आम्हा सर्वांसाठी जे योग्य असतील, असेच निर्णय आम्हाला घ्यावे लागतात."

पुढे तिने ट्रोल करणाऱ्यांना खोचक टोला लगावला, "तुम्ही एक काम करा, मी काय-काय करू शकते याची एक यादी बनवा आणि मला पाठवा. आणि हेही लिहून द्या की, मी ते सगळे केले तर कोणाला कोणतीही समस्या नसेल."

चारूने खुलासा केला की, राजीव, जियाना आणि तिने गेल्या दोन महिन्यांत एकत्र खूप चांगला वेळ घालवला आहे. "आम्ही दिल्ली, बँकॉक, परत दिल्ली, बीकानेर, कोलकाता आणि मुंबईमध्ये एकत्र राहिलो. आम्ही खूप मजा केली," असे तिने सांगितले.

ती म्हणाली, "आमच्यामध्ये कोणतीही समस्या नाही, पण इतरांना प्रत्येक गोष्टीत अडचण होत आहे, त्यामुळे कृपया 'रिलॅक्स' व्हा!" चारू असोपा आणि राजीव सेन यांनी २०१९ मध्ये लग्न केले होते आणि जून २०२३ मध्ये त्यांचा घटस्फोट झाला.