'तुम्ही ते नाकारू शकत नाही', ट्रोल होणाऱ्या सचिन पिळगांवकरांची मराठी दिग्दर्शकानं घेतली बाजू

ज्येष्ठ मराठी अभिनेते सचिन पिळगांवकर हल्ली त्यांच्या मुलाखतींमुळे, त्यांनी केलेल्या वक्तव्यांमुळे चर्चेत असतात. सचिन पिळगांवकर यांना त्यांच्या या वक्तव्यामुळे सोशल मीडियावर प्रचंड ट्रोल करण्यात आलं. त्यांनी कुठे काही बोललं तरी त्यांचं ट्रोलिंग आणि मिम्स व्हायरल होतात. मनोरंजन विश्वातील अनेक कलाकारांनी याबाबत सचिन पिळगांवकर यांची बाजू घेत आपलं मतं मांडली आहे. दरम्यान प्रसिद्ध मराठी लेखक आणि दिग्दर्शक क्षितिज पटवर्धन याने सचिन पिळगांवकर यांची बाजू घेत त्याचं त्यांच्याविषयी असलेलं मत व्यक्त केलं. 

क्षितिजचा 'अंतर' हा मराठी सिनेमा लवकरच प्रेक्षकांच्या भेटीला येतोय. या सिनेमात अभिनेत्री रेणुका शहाणे, अभिनय बेर्डे आणि हृता दुर्गुळे प्रमुख भूमिकेत आहेत. या सिनेमाच्या प्रमोशन दरम्यान क्षितिजनं सचिन पिळगांवकर यांच्याबद्दल त्याचं मत व्यक्त केलं. 

मुक्कामपोस्ट मनोरंजनला दिलेल्या मुलाखतीत सचिन पिळगांवकर यांच्यावर होणाऱ्या ट्रोलिंगवर तो बोलला. तो म्हणाला, "याला एक दुसरी बाजू आहे. पुण्यातल्या एका मुलाला मोठ्या दिग्दर्शकापुढे उभं केलं जातं. दिग्दर्शक विचारतो, 'तू काही गाणी वगैरे लिहिली आहेस का?' त्यावर तो मुलगा म्हणतो, 'नाही सर'. ते म्हणतात 'काही हरकत नाही. पहिल्यांदा काहीतरी लिहून बघ' असं म्हणत ते त्याला पहिल्यांदा संधी देतात."

"तो मुलगा म्हणजे मी आहे. तो दिग्दर्शक म्हणजे सचिन सर आहेत. ज्या मुलाला सुरुवातीला अजिबातच आत्मविश्वास नव्हता की चालीवर लिहिता येईल का, त्यानंतर मी 72 सिनेमांची गाणी लिहिली."

पुढे तो म्हणाला, "मी आणि माझ्यासारख्या असंख्य कलाकार आहेत ज्यांना फक्त कामच नाही तर आत्मविश्वासही त्या माणसाने दिला. मी त्याबद्दल खूपच कृतज्ञ आहे. आपण आपापल्या घरांमध्ये एखादी छोटी गोष्ट झाली तर आपण ती सेलिब्रेट करतो. प्रमोशन मिळालं किंवा मुलाला 80 टक्के पडले तरी आपण पन्नास जणांना व्हॉट्स अँपवर सांगतो. तेव्हा आपण म्हणतो का की किती सांगतोय."

"मला असं वाटतं की काही गोष्टी या ऑऊट ऑफ कॉन्टेक्सही घेतल्या जातात. एखाद्याचा संदर्भाबाहेर बाहेर जाऊन अधिक विचार केला जातो आणि एखादी गोष्ट उगाच चघळली जाते".

शेवटी तो म्हणाला, "सचिन यांचं मराठी आणि भारतीय सिनेमासाठीचं योगदान प्रचंड मोठं आहे. दिग्दर्शक म्हणूनच नाही तर त्यांनी माणूस म्हणून ज्या-ज्या माणसांना, जी-जी मदत केली, ज्या ज्या वेळेला ते उभे राहिले त्यांनी ज्या प्रकारे त्यांचं अस्तित्व टिकून ठेवलं आहे ते अतिशय महत्त्वाचं आहे."

"ट्रोलिंग करणारे ट्रोलिंग करून निघून जातील, पण उद्या जर लोकांनी विचारलं की सचिन पिळगांवकर सरांनी काय करत त्यांनी काय केलं तर 'अशी बनवाबनवी'सारखा सिनेमा आहे. तेव्हा कमेन्ट कोणी लक्षात नाही ठेवणार, तेव्हा सिनेमाच लक्षात राहणार. त्यामुळे कमेंट्स की काम? हे ज्याचं त्याने ठरवायचं. मी नेहमी माणसाचं काम लक्षात ठेवणारा आहे कमेंट्स नाही."  

क्षितिज शेवटी म्हणाला, "ते जे बोलत असतील, त्यांचे मिम्स येत असतील, इंटरव्ह्यू येत असतील, जे काही असेल ते. पण त्या माणसाने ज्या लोकांची घरं उभी केलीत, ज्या माणसांना आयुष्यात विश्वास दिला. या मराठी सिनेसृष्टीला एकाहून एक चांगले दहा सिनेमे दिले हे तुम्ही नाकारूच शकत नाही. मी त्यांची ती बाजू पाहतो."