जीव घाबरलेला आवाजात भीती, त्या 30 सेकंदात काय घडलं? A11 लकी प्रवाशानं सांगितला थरारक अनुभव

अहमदाबादहून लंडनला जाणारे एअर इंडियाचे विमान AI-171 गुरुवारी उड्डाणानंतर अवघ्या काही मिनिटांतच कोसळले. या भीषण अपघातातून विश्वास कुमार नावाचा एक तरुण बचावला आहे. दैव बलवत्तर म्हणावं अशी ही घटना होती. विमानातील 241 प्रवासी मृत्युमुखी पडले केवळ एकच प्रवासी वाचला.

पंतप्रधान नरेंद्र मोदी यांनी घटनास्थळाला भेट देऊन विश्वास कुमार यांची विचारपूस केली. विश्वास कुमार यांनी पंतप्रधानांना अपघाताची संपूर्ण हकीकत सांगितली. दुर्घटनेत नेमकं काय झालं, कशी झाली याबाबत पीएम मोदींनी विचारपूस केली तर मी त्यांना सांगितलं. त्यांनी माझी चौकशी केली," विश्वास यांनी सांगितले.

अपघाताबद्दल विचारले असता, विश्वास कुमार यांनी थरकाप उडवणारे अनुभव सांगितले. "ते सर्व माझ्या डोळ्यांदेखत घडलं. मी त्यातून कसा वाचलो, यावर माझा अजूनही विश्वास बसत नाही. काही क्षणांसाठी मला वाटले की मी सुद्धा मरणारच आहे, पण जेव्हा डोळे उघडले आणि पाहिले, तेव्हा मला समजले की मी जिवंत आहे.

मी माझ्या सीटमधून बेल्ट काढला आणि जिथून बाहेर पडणे शक्य होते, तिथून बाहेर पडलो, विश्वास यांच्या समोरच एअर होस्टेस आणि इतर प्रवासी, आंटी-अंकल सर्वजण त्यात अडकले होते. "टेक ऑफ झाल्यानंतर एका मिनिटाच्या आतच, अचानक ५-१० सेकंदात असे वाटले जणू काहीतरी अडकले आहे.

पुढच्या काही सेकंदात विमानात हिरवे आणि पांढरे दिवे लागले. त्यानंतर विमानाचा वेग वाढला, विमान थेट एका हॉस्टेलमध्ये घुसलं. विमान हॉस्टेलवर आदळल्यानंतर काहीच समजलं नाही. मी पटकन क्षणाचाही विलंब न करता जीव वाचवण्यासाठी उडी मारली. मी ज्या बाजूला होतो, ती बाजू हॉस्टेलवर आदळली नव्हती. हॉस्टेलच्या ग्राउंड फ्लोरच्या, म्हणजे खालील बाजूस ती आदळली होती. इतरांबद्दल मला माहीत नाही, पण मी जिथे होतो, ती खालची बाजू होती.

विमानाचा बाहेरचा भाग थोडा मोकळा होता. "जेव्हा माझा दरवाजा तुटला आणि मी बाहेर पाहिले, तेव्हा थोडी जागा दिसली. मला वाटले की मी बाहेर पडण्याचा प्रयत्न करू शकेन. मी प्रयत्न केला आणि बाहेर पडलो. कारण दुसऱ्या बाजूला इमारतीची भिंत होती, तिकडून कदाचित कोणीही बाहेर पडू शकले नसेल, कारण तिकडेच पूर्ण क्रॅश झाला होता.

मी जिथे होतो, तिथे थोडी जागा होती. तरीही मला माहीत नाही मी कसा वाचलो, कारण माझ्या डोळ्यासमोरच दोन एअर होस्टेस आणि अंकल-आंटी अडकले होते. या दुर्घटनेत विश्वास यांच्या डाव्या हाताला आगीमुळे थोडी भाजली आहे. अपघात झालेल्या ठिकाणाहून ते पायीच बाहेर पडले आणि नंतर त्यांना रुग्णवाहिकेतून रुग्णालयात आणण्यात आले.

विश्वास कुमार यांच्यावर सध्या अहमदाबादच्या सिव्हिल हॉस्पिटलमध्ये उपचार सुरू आहेत. "इथे उपचार खूप चांगले होत आहेत. इथले लोक खूप सहकार्य करत आहेत, खूप चांगले उपचार करत आहेत," असे त्यांनी समाधान व्यक्त केले.