kalyan Famous Food Places: नुसता वास आला तर तोंडाला पाणी सुटणार! कल्याणच्या विलास मामांची भजी, खाण्यासाठी लागतात रांगा

महाराष्ट्रात सकाळचा नाष्टा म्हटलं की सर्वांजण मराठमोळे, घरगुती पदार्थ खात असतात,ज्यात पोहे, शिरा, उपमा, कट वडा, वडा उसळ, मिसळ हे पारंपरिक पदार्थ प्रत्येकाच्या लाडक्या यादीत असतात.

सध्या थंडीचे दिवस असल्याने गरमागरम भजी खाणाऱ्यांची संख्या मोठी आहे. त्यातही कल्याण पूर्वेतल्या मामाच्या नेतीवली वडापाव सेंटरवर मिळणाऱ्या गोलभजींची चव म्हणजे खास आकर्षण. सकाळी सकाळी इथं खवय्यांची रांग लागलेली पाहायला मिळते.

कल्याण पूर्वेतील नेतीवली नाका परिसरात 1995 पासून विलास गवस यांनी चालवलेले हे सेंटर आज कल्याणकरांचे आवडते ब्रेकफास्ट स्पॉट बनले आहे. ''मामाची गोलभजी'' हा इथला मुख्य आवडता पदार्थ आहे.

बेसनाच्या पिठात योग्य प्रमाणात पाणी मिसळून, चिरलेला कांदा आणि चवीपुरते मीठ घालून या गोलभज्या तयार केल्या जातात. मोठ्या कढईत सोनसळी रंग येईपर्यंत तळलेल्या या भजींचा सुगंध परिसरात दरवळत राहतो. ताजी, गरम भजी प्लेटमध्ये वाढताना तिच्यासोबत मिळणारी पांढरी खोबरेलसूण चटणी ही या भजींची खरी चव वाढवते.

इथं फक्त गोलभजीच नाही तर वडा-पाव, वडा उसळ, ब्रेड पॅटीस, कांदा- मिरची भजी हेही पदार्थ तितक्याच लोकप्रिय आहेत. सकाळी ऑफिसला जाणारे असो वा कॉलेजचे विद्यार्थी, तर काही तर खास भजीच्या प्रेमापोटी कल्याण-पलीकडूनही येतात.

कल्याणकरांची सकाळ म्हणजेच मामाच्या सेंटरवरील भजी. थंडीच्या दिवसात तर इथे होणारी गर्दी पाहण्यासारखी असते. एकदा का गोलभजीची प्लेट हाती पडली, की सकाळचा मूडच बदलून जातो.

कुठे?- मामाचे नेतीवली वडापाव सेंटर नेतीवली नाक्यावर, कल्याण पूर्वेत असून येथे सकाळपासून गरमागरम गोलभजी, वडा पाव, वडा उसळ आणि विविध भजींचा आस्वाद घेण्यासाठी नेहमीच खवय्यांची मोठी गर्दी दिसते.