Pune Weather: पुढील 24 तास धोक्याचे, पश्चिम महाराष्ट्रात पुन्हा जोरदार पाऊस, हवामान विभागाचा अलर्ट

चार दिवसांच्या विश्रांतीनंतर पुणे, सातारा आणि कोल्हापूर घाटमाथ्यावर पुन्हा जोरदार पाऊस बरसणार आहे. राज्यात पाऊस ओसर कमाल तापमानात वाढ होऊन तापमान तिशीपार गेले आहे. आज दिनांक 14 जुलै रोजी पश्चिम महाराष्ट्रातील घाटमाथ्यावर जोरदार पावसाचा यलो अलर्ट भारतीय हवामान विभागाने दिला आहे.

सातारा जिल्ह्यात मागील 24 तासात मध्यम पाऊस कोसळला. सातारा परिसरामध्ये 2.6 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 28 अंश सेल्सिअस राहिल. सातारा जिल्ह्यामध्ये ढगाळ आकाशासह मध्यम पावसाची शक्यता हवामान विभागाने वर्तवली आहे. घाटमाथ्यावर मात्र जोरदार पावसाचा यलो अलर्ट देण्यात आला आहे.

मागील 24 तासात पुण्याच्या शिवाजीनगर परिसरात पावसाची उघडीप राहिली. यावेळी कमाल तापमान 28.2 अंश सेल्सिअस राहिले. पुढील 24 तासात पुणे घाटमाथ्यावर जोरदार पाऊस असून दक्षतेचा यलो अलर्ट देण्यात आला आहे.

कोल्हापूर परिसरात 1.1 मिलीमीटर पाऊस नोंदविण्यात आला. यावेळी कमाल तापमानात वाढ नोंदविण्यात आली. कमाल तापमान 27.3 अंश सेल्सिअस राहिले. पुढील 24 तासात कमाल तापमान 29 अंशावर स्थिर राहिल. तसेच कोल्हापूर घाटमाथ्यावर जोरदार पावसाची शक्यता असल्याने सतर्कतेचा यलो अलर्ट हवामान विभागाकडून वर्तवण्यात आला आहे.

सोलापूर जिल्हात पावसाची उघडीप कायम असून जिल्ह्यातील कमाल तापमान वाढ होत आहे. मागील 24 तासात 33.4 अंश तापमानाची नोंद सोलापूरमध्ये झाली. पुढील 24 तासात कमाल तापमानाचा पारा 33 अंशावर राहणार असून तुरळक ठिकाणी हलक्या पावसाची शक्यता आहे.

मागील 24 तासात सांगली जिल्ह्यात 1 मिलिमीटर पावसाची नोंद झाली. पुढील 24 तासात सांगली जिल्ह्यात ढगाळ आकाशासह हलक्या पावसाचा अंदाज आहे. यावेळी जिल्ह्यातील कमाल तापमान 30 तर किमान तापमान 22 अंश सेल्सिअस इतके राहील.

पश्चिम महाराष्ट्रातील सर्वच जिल्ह्यांत आकाश साधारणपणे ढगाळ राहील. सातारा, पुणे आणि कोल्हापूर घाट परिसरात जोरदार पाऊस राहिल. तसेच जिल्हाअंतर्गत परिसरात हलका पाऊस राहील.