Pune Rain: 24 तास पावसाचे, पुणे ते कोल्हापूर धो धो कोसळणार, हवामान विभागाचा धोक्याचा इशारा

गेल्या 2 दिवसांपासून संपूर्ण राज्यभरात जोरदार पाऊस कोसळतो आहे. तर काही ठिकाणी ढगफूटी सदृश्य पाऊस झाला. आज 14 जून रोजी दक्षिण मध्य महाराष्ट्रासह विदर्भात वादळी पावसाची शक्यता असल्याने दक्षतेचा ऑरेंज अलर्ट देण्यात आला आहे. उर्वरित राज्यात विजांसह जोरदार पावसाचा अंदाज असल्याने सतर्कतेचा यलो अलर्ट आहे.

मागील 24 तासात कोल्हापूर परिसरात 69 मिलीमीटर पावसाची नोंद झाली. पुढील 24 तासात कोल्हापूरच्या घाटमाथ्यावर विजांच्या कडकडाटासह जोरदार पावसाची शक्यता आहे. जोरदार वादळी पावसाची शक्यता असल्याने भारतीय हवामान विभागाने कोल्हापूरच्या घाटमाथ्यास दक्षतेचा ऑरेंज अलर्ट दिला आहे. तसेच कोल्हापूर परिसरास येलो अलर्ट देण्यात आला आहे.

पुढील 24 तासात सांगली जिल्ह्यात वाऱ्यासह एक- दोन वेळा जोरदार पावसाचा अंदाज आहे. गडगडाटी पावसाची शक्यता असल्याने सतर्कतेचा येलो अलर्ट हवामान विभागाकडून वर्तवण्यात आला आहे. यावेळी जिल्ह्यातील कमाल तापमान 31 तर किमान तापमान 23 अंश सेल्सिअस इतके राहील.

साताऱ्यातील पारा 30.7 अंश सेल्सिअसवर राहिला. तसेच मागील 24 तासात 19 मिलीमीटर पावसाची नोंद झाली. पुढील 24 तासात सातारा जिल्ह्यातील कमाल तापमान 32 अंशावर राहिल. जिल्ह्यात विजांच्या कडकडाटासह प्रतितास 40-50 किलोमीटर वेगवान वाऱ्यासह जोरदार पावसाची शक्यता असल्याने सातारा घाटमाथ्यास सतर्कतेचा ऑरेंज अलर्ट आणि सातारा परिसरास यलो अलर्ट देण्यात आला आहे.

पुढील 24 तासात सोलापूर जिल्ह्यातील कमाल तापमान 26 अंशावर राहीले. ढगाळ आकाशासह हलक्या पावसाचा अंदाज भारतीय हवामान विभागाने वर्तवला आहे.

पुणे जिल्ह्यात मागील 24 तासात 30.8 अंश सेल्सिअस कमाल तापमानाची नोंद झाली. शिवाजीनगर परिसरात 25.8 मिलीमीटर पावसाची नोंद झाली. पुढील 24 तासात कमाल तापमान 30 अंशावर राहील. पुण्यात 24 तासांसाठी जोरदार पावसाचा ऑरेंज अलर्ट जारी करण्यात आला आहे.

अरबी समुद्रापासून ओडिशा किनाऱ्यापर्यंत हवेचा कमी दाबाचा पट्टा विस्तारला आहे. या प्रणाली पूरक ठरत असल्याने राज्यात पावसाला सुरुवात झाली आहे. कोल्हापूर ते पुणे घाटमाथ्याच्या परिसरात मुसळधार पाऊस सुरू असून काही ठिकाणी अतिवृष्टी झालीये. त्यामुळे पुढील काही दिवस योग्य ती काळजी घ्यावी लागेल.