Kazakhstan Plane Crash: धुक्यामुळे रुट बदलला अन् घात झाला, घटनास्थळावरचे PHOTO आले समोर

ऐन ख्रिसमसदरम्यान शोककळा पसरली आहे. याचं कारण म्हणजे 110 प्रवाशांना घेऊन जाणारं विमान कोसळलं आहे. मिळालेल्या प्राथमिक माहितीनुसार या विमानाचा रुट बदलला होता, त्याच दरम्यान हा अपघात झाला आहे.

कझाकस्तानमधील अकताऊ शहराजवळ 105 प्रवासी आणि 5 क्रू मेंबर्सला घेऊन जाणारं विमान कोसळलं. मध्य आशियाई देशाच्या आपत्कालीन मंत्रालयाने सांगितले की प्राथमिक अहवालानुसार विमानातील काही लोकांना रेस्क्यू करण्यात यश आलं आहे.

अपघातादरम्यानचे फोटो आणि व्हिडीओ सोशल मीडियावर प्रचंड व्हायरल होत आहेत. या व्हिडीओमध्ये विमान अक्षरश: हेलकावे खात कोसळत असल्याचं दिसत आहे.

या अपघाताची माहिती मिळताच तातडीनं आपत्कालीन व्यवस्थापन घटनास्थळी दाखल झाले. त्यांनी लोकांना रेस्क्यू करण्याचं काम सुरू केलं. आगीवर नियंत्रण मिळवलं आणि कूलिंग ऑपरेशन सुरू केलं.

मिळालेल्या माहितीनुसार हे विमान अझरबैजान एअरलाइन्सद्वारे चालवले जात होते. हे विमान बाकूहून रशियातील चेचन्या येथील ग्रोझनी येथे जात होते. पण, ग्रोझनीमध्ये धुक्यामुळे त्याचा मार्ग बदलण्यात आला.

कझाकिस्तानच्या स्थानिक मीडियानुसार, विमानात 105 प्रवासी आणि 5 क्रू मेंबर्स होते. तथापि, रॉयटर्सने या माहितीची पुष्टी केलेली नाही. अझरबैजान एअरलाइन्सकडून या अपघाताबाबत अद्याप कोणतेही अधिकृत वक्तव्य आलेले नाही.

ही दुर्घटना विमान वाहतूक सुरक्षेसाठी आणखी एक आव्हानात्मक घटना आहे. अधिक माहिती आल्यानंतर परिस्थिती स्पष्ट होईल.