Photos : श्वानासाठी बनवला तब्बल 7 लाखांचा काचेचा महाल, सुविधा अशा की वाचून तुम्हीही थक्क व्हाल!

डॉ. शमीम अहमद असे या व्यक्तीचे नाव आहे. त्यांनी आपला श्वान अॅलेक्स याच्यासाठी आधुनिक सुविधा असलेला रिसॉर्ट तयार केला आहे. मेरठच्या ट्रान्सलाम कॉलेज ऑफ फार्मसीमध्ये तुम्हाला हा डॉग रिसॉर्ट दिसेल. येथे डॉ. शमीम यांनी त्यांचा लाडका श्वान ॲलेक्स आणि इतर प्राण्यांसाठी सर्व व्यवस्था केली आहे.

डॉ. शमीम अहमद हे उत्तरप्रदेशातील मेरठ येथील रहिवासी आहेत. लोकल18 शी बोलताना त्यांनी सांगितले की, त्यांनी काही वर्षांपूर्वी ॲलेक्सची सुटका केली होती आणि तेव्हा त्याच्यासाठी झोपडी बांधली होती. यात श्वानासाठी अनेक सुविधा आहेत. पण वाढती उष्णता पाहून डॉ. शमीम अहमद यांनी आता ॲलेक्ससाठी काचेचा महाल बांधला आहे. त्याला ॲलेक्स रिसॉर्ट असे नाव देण्यात आले आहे. हे घर तयार करण्यासाठी सात लाखांहून अधिक रुपये खर्च झाले आहेत, असे ते म्हणाले. 

याबाबत ते म्हणाले की, ॲलेक्स रिसॉर्टच्या सुविधांबद्दल सांगायचे झाले तर, हे संपूर्ण घर काचेचे आहे. या काचेच्या घरात एसी, पंखा, डबल बेड, मऊ गादी यासह अनेक आधुनिक सुविधा आहेत. इतकेच नव्हे तर, स्विमिंग पूल, पाळणा, गाण्यासाठी होम थिएटर, कारंजे आणि ॲलेक्सला विविध ठिकाणी बसण्यासाठी खुर्च्या आहेत. 

डॉ. शमीम अहमद सांगतात की, जगात सर्वात मोठा धर्म आहे मानवता. यासाठी ते या प्राण्यासाठी प्रत्येक महिन्याला 1 लाख रुपयांपेक्षा जास्त आपल्या सॅलरीतील पैसे खर्च करतात. ॲलेक्सच्या कुटुंबात मांजर, ससा, मासे, बदक, पक्षी इत्यादीही या घरात राहतात. ते रस्त्यावरील कुत्रे आणि गायींच्या भोजनाची व्यवस्था करतात. अलेक्ससाठी बांधलेल्या काचेच्या महालात तुम्हाला एका बाजूला ओम आणि दुसऱ्या बाजूला 786 अशाप्रकारे सर्वधर्म समभावाची झलक पाहायला मिळेल, अशी माहिती त्यांनी दिली.

लोकल18 शी बोलताना ते पुढे म्हणाले की, ते एकूण 11 भाऊ-बहीण आहेत. यामध्ये 4 याचप्रकारे प्राण्यांची काळजी घेत आहेत. डॉ. शमीम यांनी लग्न केले नाही. त्यांची मोठी बहीण शबाना या कॅनडामध्ये राहतात. प्राणी हे त्यांच्यासाठी मुलासारखी आहेत. ते अॅलेक्सला आपला मुलगा मानतात.