Ajit Pawar : अजित पवारांचा विमान अपघातापूर्वी शेवटचा मोठा राजकीय निर्णय; 'त्या' फोन कॉलची भावुक कथा

नुकत्याच झालेल्या महानगरपालिका निवडणुकीत राष्ट्रवादी काँग्रेसने दमदार कामगिरी करत दुसरा सर्वात मोठा पक्ष होण्याचा मान मिळवला. यामुळे महापालिकेत विरोधी पक्षनेतेपद कोणाकडे जाणार, याकडे सर्वांचे लक्ष लागले होते. शहराध्यक्ष सुभाष जगताप, आमदार चेतन तुपे आणि सुनील टिंगरे यांच्या उपस्थितीत झालेल्या नगरसेवकांच्या बैठकीत, हे नाव ठरविण्याचे सर्वाधिकार अजित पवार यांना देण्यात आले होते. त्यानुसार, दादांनी अनुभवी चेहरा म्हणून अॅड. नीलेश निकम यांच्या नावावर शिक्कामोर्तब केले.

मंगळवारी रात्री हा निर्णय निश्चित झाल्यानंतर, बुधवारी सकाळी ७ वाजेपासून नीलेश निकम हे अजित दादांना फोन करून त्यांचे आभार मानण्याचा प्रयत्न करत होते. "मी वारंवार संपर्क साधत होतो, पण दादांचा फोन लागत नव्हता. कदाचित ते विमान प्रवासात असावेत, असा विचार मी केला. मात्र, काही वेळातच त्यांच्या अपघाताची बातमी धडकली," असे सांगताना निकम यांचा कंठ दाटून आला.