संशोधक विद्यार्थ्यांचं कौतुकास्पद कार्य, पुरंदर किल्ल्यावर केलं मोठं काम

पुणे : नुकताच 350 वा राज्यभिषेक दिन सोहळा पार पडला. याच निमित्ताने मराठवाड्यातील संशोधक विद्यार्थ्यानी एकत्र येत कौतुकास्पद कार्य केले. या सर्वांनी पुणे जिल्ह्यातील पुरंदर किल्ल्याच्या पायथ्याशी सीडबॉलचे बीजारोपण केले. त्यामध्ये एक, दोन नव्हे तर तब्बल 13 हजार 350 सीडबॉलची लागवड करण्यात आली. यामध्ये वेगवेगळ्या रान बियादेखील आहेत. जसे की आंबा, कडूलिंब, बाभूळ इ.

छत्रपती शाहू महाराज संशोधन आणि मानव विकास संस्था अर्थात सारथीकडून सध्या एक अभिनव उपक्रम राबवला जात आहे. याच उपक्रमाचा एक भाग म्हणून डॉ. बाबासाहेब आंबेडकर मराठवाडा विद्यापीठात संशोधन करणाऱ्या सारथीच्या संशोधक विद्यार्थ्यांनी तब्बल 13 हजार सीडबॉलचे पुरंदर किल्ल्यावर बीजारोपण केले. या उपक्रमात सारथीचे संशोधक विद्यार्थी अमोल देशमुख, राणी मतसागर, नर्मदा तांगडे आणि वीरराजे अशोकराव म्हसलकर तरुणांनी उपक्रमात सहभाग घेतला.

सीडबॉल तयार करण्यापूर्वी प्रामुख्याने पाच गोष्टी खूप महत्त्वाची भुमिका पार पाडतात. एक म्हणजे काळी माती, दोन म्हणजे कंपोस्ट खत, तीन म्हणजे कोकोपीट, चार म्हणजे पाणी आणि पाच म्हणजे वन्य सावली देणाऱ्या रान झाडांच्या बिया, यामध्ये पाहायला मिळतात, अशी माहिती सारथीचे संशोधक विद्यार्थी वीर म्हसलकर यांनी दिली.