आदिवासी मुलांच्या शिक्षणासाठी घेतला पुढाकार, देविका यांनी सुरू केली दुर्गम भागात शाळा, Video पाहून तुम्ही कराल कौतुक

देविका घुले यांनी सांगितलं की, देविका महिला मंडळ या संस्थेची स्थापना 1993 साली श्रीमती मीनाताई सूर्यवंशी यांनी केली. आर्थिकदृष्ट्या दुर्बळ घटकातील आणि वंचित महिलांना सन्मानाने जीवन जगता यावे, या उद्देशाने ही संस्था स्थापन करण्यात आली. संस्था स्थापन झाल्यानंतर आम्ही आदिवासी भागातील लोकांसाठी काम सुरू केले. या कामादरम्यान आमच्या एक गोष्ट लक्षात आली की आदिवासी मुले शाळेत जात नाहीत. ती मुलं शिक्षित व्हावीत आणि समाजाच्या मुख्य प्रवाहात यावीत म्हणूनच आम्ही सुरगाणा तालुक्यात ‘स्मार्ट किड्स स्कूल’ नावाची शाळा सुरू केली.

शाळा सुरू केल्यानंतर सुरुवातीचा काळ खूप कठीण होता. अनेक आदिवासी पालक आपल्या मुलांना शाळेत पाठवायला तयार नव्हते. त्यांना पटवून देण्यासाठी आम्हाला गावोगाव फिरावं लागलं, त्यांच्या शंका दूर कराव्या लागल्या. त्यांच्या मनात शिक्षणाचं महत्त्व निर्माण करावं लागलं. या सगळ्या नंतर आदिवासी पालकांनी आपल्या मुलांना शाळेत पाठवायला सुरुवात केली.

सध्या शाळेत दीडशेहून अधिक मुलं शिक्षण घेत आहेत. शाळेत सध्या नर्सरी ते बालवाडीपर्यंतच शिक्षण दिलं जातं, मात्र पुढे आणखी वर्ग सुरू करण्याचं नियोजन आहे. या मुलांचं पुढचं शिक्षण खंडित होऊ नये म्हणून आम्ही त्यांना इतर शाळांमध्ये दाखल करून देतो, ज्यामुळे त्यांचं शिक्षण सुरू राहतं. या उपक्रमामुळे त्या भागात शिक्षणाबाबत मोठा बदल घडताना दिसत आहे. पालक आणि मुलांमध्ये शिक्षणाबद्दल जागरूकता वाढत असून गावकऱ्यांच्या दृष्टिकोनात सकारात्मक परिवर्तन होत आहे.