गँगस्टर निलेश घायवळमुळे भावाचाही बाजार उठला, पुणे पोलिसांनी केला 'करेक्ट कार्यक्रम', आता सुटका नाही!

पुणे : पुण्यातील कुख्यात गँगस्टर निलेश घायवळच्या गुंडगिरीमुळे त्याचा भाऊ सुद्धा आता अडचणीत सापडला आहे. पुणे पोलिसांनी आता  निलेश घायवळ याच्यासह आता सचिन घायवळवर देखील मोका अंतर्गत गुन्हा दाखल केला आहे. या प्रकरणात आता सचिन घायवळला सुद्धा कोथरूड पोलिसांनी आरोपी केलं आहे. त्यामुळे दोघा भावांचा पोलिसांनी चांगलाच करेक्ट कार्यक्रम केला आहे.

दरम्यान, पिस्तुल परवाना प्रकरणात गृहराज्यमंत्री योगेश कदम यांनी निलेश घायवळचा सख्खा भाऊ आणि कुख्यात गुंड सचिन घायवळ याला शस्त्र परवाना मंजूर केला होता. या परवान्यास पोलिसांचा विरोध असूनही कदमांनी शस्त्र परवाना दिला होता. घायवळ याच्यावर कोणत्याही प्रकारचे गुन्हे नोंद नाही म्हणून त्यांना मी शस्ञ परवाना दिला, असा बचाव योगेश कदमांनी केला होता. पण  सचिन घायवळवर गुन्ह्याची यादीच समोर आली आहे.