रिक्षात बसलं की कोयता काढायचे, अपहरण अन् लाखोंची लूट; पुण्यात त्या दोघांची दहशत, शेवटी ती रिक्षा दिसली अन्...सिनेमासारखा थरार

मिळालेल्या माहितीनुसार, या टोळीने १६ मार्च २०२६ रोजी सूरज शेलार नावाच्या व्यक्तीचे पैशांसाठी अपहरण केले होते. याशिवाय, अवघ्या एक दिवस आधी म्हणजेच १५ मार्चला नाशिक फाटा येथून नितीन महाजन यांना रिक्षात बसवून कोयत्याचा धाक दाखवत त्यांचेही अपहरण केले होते. या गुन्ह्यांमुळे सांगवी आणि भोसरी परिसरात मोठी दहशत निर्माण झाली होती.

अपहरणाचा कॉल येताच पोलीस उपायुक्त डॉ. शिवाजी पवार यांच्या मार्गदर्शनाखाली तांत्रिक विश्लेषण करण्यात आले. भोसरी एमआयडीसी परिसरातील एका मोकळ्या मैदानात आरोपी दोन रिक्षांसह दबा धरून बसले होते. पोलिसांनी घेराव घालताच आरोपींनी पळून जाण्याचा प्रयत्न केला, मात्र पोलिसांनी आवश्यक बळाचा वापर करून त्यांना जागीच जेरबंद केले. झडतीमध्ये दोन रिक्षा, दोन तीक्ष्ण कोयते, मोबाईल आणि रोख रक्कम हस्तगत करण्यात आली आहे. या कारवाईमुळे शहरातील दोन मोठे गुन्हे उघडकीस आले असून पोलीस पुढील तपास करत आहेत.