Pit bull Attack : पुण्यात राख अंगावर पडल्याने तरुणावर सोडला पिटबूल कुत्रा; पुढे घडलं भयानक

याप्रकरणी पर्वती पोलीस ठाण्यामध्ये संबंधित तरुणाविरोधात गुन्हा दाखल करण्यात आला आहे. आदित्य नितीन आंदेकर (वय 25, सर्वे नंबर 92, शाहू वसाहत, लक्ष्मी नगर, पर्वती), असे गुन्हा दाखल झालेल्याचे नाव आहे. याप्रकरणी तन्वीर रमजान सय्यद (वय 18, रा. लक्ष्मी नगर, पर्वती) यांनी फिर्याद दिली आहे. पोलिसांनी दिलेल्या माहितीनुसार, तन्वीर सय्यद हे या घटनेत गंभीर जखमी झाले आहेत. पर्वती पोलिसांनी दिलेल्या माहितीनुसार, तन्वीर आणि त्यांचे मित्र घराजवळच शेकोटी करत बसलेले होते. त्या ठिकाणी असलेल्या भिंतीवर राखेची टोपली ठेवण्यात आलेली होती. ही राखेची टोपली आरोपी आदित्य आंदेकरच्या अंगावर पडली. त्यामुळे चिडलेल्या आदित्य याने याबाबत विचारणा करण्यास सुरुवात केली. ही टोपली तन्वीर यानेच टाकली असा समज त्याने करून घेतला. त्याने तन्वीरला शिवीगाळ करून गचांडी पकडत हाताने मारहाण करण्यास सुरुवात केली. त्याचे पिटबुल जातीचे कुत्रे सोबत होते. या कुत्र्याला ‘सारा धर याला’ असे म्हणत त्याच्या अंगावर सोडले. या कुत्र्याने फिर्यादीच्या हाताला आणि पार्श्वभागाला चावा घेत त्यांना गंभीर जखमी केले. त्यानंतर आरोपीने ‘पोलीस चौकीमध्ये तक्रार देतोस काय?’ असे म्हणत बघून घेण्याची धमकी देऊन दमदाटी केली आहे.