पुणे Porsche अपघात : विशाल अग्रवालचे आमदार टिंगरेंना 45 तर डॉक्टर तावरेला 15 कॉल; काय झालं बोलणं?

सूत्रांनी दिलेल्या माहितीनुसार, अपघाताच्या रात्री सुनील टिंगरे यांना विशाल अग्रवालचे 45 मिस्ड कॉल आले होते. हे मिस्ड कॉल्स पहाटे 2.30 - 3.45 च्या दरम्यान होते. सुनील टिंगरे पहाटे ३.४५ च्या सुमारास येरवडा पोलीस ठाण्यात आले. ⁠त्यादिवशी टिंगरे झोपले होते आणि मिस्ड कॉल्स अनुत्तरीत होते हे लक्षात घेऊन विशाल अग्रवाल त्याला घेण्यासाठी टिंगरे यांच्या घरी गेला. ⁠त्यानंतर टिंगरे रविवारी पहाटेपर्यंत पोलिस ठाण्यात हजर होते.

रक्ताचे नमुने बदलल्या प्रकरणी अटक करण्यात आलेल्या दोन डॉक्टरांचं निलंबन करण्यात आलंय. यासोबत वॉर्डबॉयवरही निलंबनाची कारवाई केली आहे. नियमानुसार सरकारी एखादा कर्मचारी 48 तासांपेक्षा जास्त वेळ पोलीस कोठडीत असेल तर त्यांना निलंबित करण्यात येते. अजय तावरे आणि श्रीहरी हालनोर यांच्यावर निलंबनाची कारवाई केलीय.  निलंबनानंतर त्यांची खात्यांतर्गत चौकशी केली जाईल. दोन्ही डॉक्टर आणि वॉर्डबॉयवर खात्यांतर्गत कारवाई होईल. यात खात्यांतर्गत स्थापन केलेली समिती चौकशी करेल आणि त्यांनी अहवाल सादर केल्यानंतर त्यांच्यावर कारवाई करण्यात येईल.