Pune Cyber crime: 'अतिरेक्यांना पैसे पुरवले...चौकशीचे आदेश' NIA चीफ असल्याचं सांगून पुण्यात 14500000 रुपयांना गंडा

सायबर गुन्हेगारांनी अत्यंत योजनाबद्ध पद्धतीने फिर्यादीला जाळ्यात ओढले. त्यांनी स्वतःला राष्ट्रीय तपास यंत्रणेचा प्रमुख असल्याचे भासवत या ७० वर्षीय वृद्धाशी संपर्क साधला. फसवणूक करणाऱ्यांनी फिर्यादीला सांगितले की, पहलगाम येथे झालेल्या दहशतवादी हल्ल्यातील अतिरेक्यांशी त्यांचा संबंध आहे. फसवणूक करणाऱ्यांनी फिर्यादीला धमकावले की, पहलगाम हल्ल्यातील अतिरेक्यांना त्यांनीच पैसे पुरवले आहेत. इतकेच नव्हे, तर त्यांच्या वेगवेगळ्या बँक खात्यातून अतिरेक्यांना पैसे पुरवल्याची खोटी माहिती देत, त्याबद्दल फिर्यादीला भासवण्यात आले.

या बनावट अधिकाऱ्यांनी या ७० वर्षीय नागरिकाला त्वरित पोलीस चौकशीची धमकी दिली. 'तुम्ही दहशतवाद्यांच्या संपर्कात आहात त्यांना आर्थिक मदत केली त्यामुळे तुमच्यावर कठोर कारवाई केली जाईल,' असे सांगून त्यांना मानसिक दडपण आणलं. या धमकीमुळे घाबरलेल्या फिर्यादीने त्यांच्यावर विश्वास ठेवला. चौकशीच्या बहाण्याने आणि कारवाई टाळण्याच्या नावाखाली, आरोपींनी फिर्यादीला त्यांचे सगळे बँक खाते तपशील आणि इतर आवश्यक गोपनीय माहिती जाणून घेतली. त्यानंतर वेगवेगळ्या टप्प्यांमध्ये त्यांच्या खात्यातून 1 कोटी 45 लाख रुपये काढून घेतले. फिर्यादीला पैसे गमावल्याचे लक्षात आल्यावर त्यांना धक्का बसला आणि त्यांनी त्वरित सायबर पोलिसांशी संपर्क साधला.

या संपूर्ण प्रकरणाचा तपास आता पुणे सायबर पोलीस करत आहेत. अज्ञात आरोपींविरुद्ध गुन्हा दाखल करण्यात आला असून, पोलिसांनी या फसवणूक करणाऱ्या टोळीचा आणि त्यांनी वापरलेल्या बँक खात्यांचा शोध सुरू केला आहे. एवढ्या मोठ्या प्रमाणात झालेली आर्थिक फसवणूक आणि त्यासाठी वापरलेली 'डिजिटल अरेस्ट' सारखी नवी पद्धत पाहता, सायबर पोलीस यंत्रणा अधिक सतर्क झाली आहे.

या घटनेने ज्येष्ठ नागरिकांना विशेषतः सावध राहण्याचा इशारा दिला आहे. कोणत्याही अज्ञात व्यक्तीने सरकारी अधिकारी, पोलीस किंवा तपास यंत्रणेचे नाव वापरून संपर्क साधल्यास, किंवा तत्काळ कारवाईची/अटकेची धमकी देऊन पैसे किंवा बँक तपशील मागितल्यास, त्वरित घाबरून जाऊ नये. अशा प्रकारच्या कॉलला प्रतिसाद देण्याऐवजी, तातडीने सायबर पोलीस स्टेशनमध्ये किंवा स्थानिक पोलीस स्टेशनमध्ये संपर्क साधून माहितीची सत्यता पडताळून पाहावी, असे आवाहन पोलिसांनी केले आहे.