Pune Crime : रक्षकच धोक्यात! पुण्यात सराईताने पकडायला आलेल्या पोलिसांवर झाडल्या गोळ्या, शेवटी...

चंदननगर पोलीस ठाण्यात दाखल असलेल्या बेकायदा शस्त्र बाळगणे आणि गंभीर मारहाणीच्या गुन्ह्यात ओंकार भंडारे हा गेल्या अनेक दिवसांपासून पोलिसांना गुंगारा देत होता. तो नगर रस्त्यावरील आव्हाळवाडी परिसरात लपल्याची गुप्त माहिती पोलिसांच्या पथकाला मिळाली होती. त्यानुसार सहायक पोलीस निरीक्षक गणेश जगदाळे आणि पोलीस उपनिरीक्षक रवींद्र ढावरे यांच्या नेतृत्वाखालील पथकाने शनिवारी सायंकाळी सव्वासहाच्या सुमारास परिसरात सापळा रचला.

पोलीस जवळ आल्याचे पाहताच, झुडपात दबा धरून बसलेल्या ओंकारने पोलिसांच्या दिशेने आपल्याकडील देशी बनावटीच्या पिस्तुलातून गोळी झाडली. या हल्ल्यात पोलीस कर्मचारी सुदैवाने बचावले. मात्र, परिस्थिती हाताबाहेर जात असल्याचे पाहून उपनिरीक्षक ढावरे यांनी स्वसंरक्षणासाठी आणि आरोपीला रोखण्यासाठी आपल्या जवळील सरकारी पिस्तुलातून गोळी झाडली. ही गोळी ओंकारच्या डाव्या मांडीला लागली, ज्यामुळे तो जागीच कोसळला.