रात्रीची वेळ; रस्त्यावर उभा होता टेम्पो, जवळ जाताच पोलिसांचा संशय खरा ठरला, पुण्यातील थरार

पुणे : पुणे ग्रामीण पोलिसांना आंतरराज्य दरोडेखोर टोळीला जेरबंद करण्यात मोठं यश मिळालं आहे. राजगुरूनगर येथे दरोडा टाकण्याच्या तयारीत असलेल्या गुजरातमधील गोध्रा येथील तीन आरोपींना स्थानिक गुन्हे शाखेच्या पथकाने शिताफीने अटक केली आहे. पुणे ग्रामीण पोलिसांच्या स्थानिक गुन्हे शाखेचे पथक खेड पोलीस स्टेशनच्या हद्दीत गस्त घालत होतं. यावेळी त्यांना होलेवाडी येथे रात्री पावणेदहाच्या सुमारास एक टेम्पो संशयास्पद स्थितीत उभा दिसला. टेम्पोत एकूण पाच जण होते आणि पोलिसांनी त्यांची चौकशी सुरू करताच त्यातील दोघांनी पळ काढला. मात्र इरफान अब्दुलअमीद दुर्वेश (वय ४२), मोहम्मद अली हुसेन रेहमत (वय २१) आणि उमरफारूख अब्दुलसत्तार (वय ३६, तिघेही रा. गोध्रा, गुजरात) या तिघांना जागेवरच पकडण्यात पोलिसांना यश आलं.