Pune News : पुणे-नगर महामार्ग अतिक्रमणमुक्त करण्यासाठी PMRDA चा मोठा निर्णय, या तारखेनंतर थेट धडक कारवाई करणार

पुणे-नगर महामार्गावरील वाहतूक कोंडीच्या समस्या वाढल्यामुळे नागरिकांनी अनेकदा आंदोलने केली होती. यानंतर PMRDA ने स्थानिक प्रशासन आणि शासकीय यंत्रणांबरोबर मिळून अतिक्रमण हटवण्याची तयारी सुरू केली आहे. अतिरिक्त आयुक्त दीपक सिंगला यांच्या मार्गदर्शनाखाली झालेल्या आढावा बैठकीत शिरूर, शिक्रापूर, सणसवाडी, कोरेगाव भीमा आणि रांजणगाव गणपती परिसरातील रस्त्यांवरील अतिक्रमणांवर चर्चा करण्यात आली. जड वाहन वाहतूक, वाहतुकीतील अडथळे आणि अतिक्रमणे यावर उपाययोजना करण्यासाठी या महिन्याच्या 24 ऑक्टोबरनंतर अतिक्रमणमुक्त नगर रोड मोहीम राबविण्याचा निर्णय घेण्यात आला आहे.

ही मोहीम राबविल्याने महामार्गावरील वाहतुकीचा प्रवाह सुरळीत होईल आणि नागरिकांचा दैनंदिन प्रवास अधिक सोपा आणि सुरक्षित होईल. यासाठी नागरिक, व्यापारी आणि स्थानिक प्रशासनाला PMRDA ने सहकार्य करण्याचे आवाहन केले आहे. तसेच या मोहिमेमुळे रस्त्यावरील जाम, वाहतुकीतील त्रास आणि अपघातांच्या शक्यता कमी होतील. नागरिकांनी वेळेत अतिक्रमणे काढून दिल्यास त्यांना भविष्यातील कारवाईची टाळता येईल. PMRDA ची ही मोहीम शिरूर तालुक्यातील रस्त्यांची स्थिती सुधारण्यासाठी महत्त्वाची पाऊल ठरणार आहे.