‎Navratri 2025: नवरात्रौत्सवासाठी पुणे-मुंबई एक्सप्रेसवेवर वाहतूक बदल, 'या' पर्यायी मार्गाचा करा वापर

राज्यभरातून येणाऱ्या भाविकांमुळे परिसरात वाहतूक कोंडी टाळण्यासाठी जिल्हाधिकारी जितेंद्र डुडी यांनी वाहतुकीत तात्पुरते बदल करण्याचे आदेश दिले आहेत. मोटार वाहन कायदा, 1988 चे कलम 115 तसेच शासन गृह विभागाच्या 19 मे 1990 च्या अधिसूचनेनुसार हे आदेश देण्यात आले असून, 22 सप्टेंबर ते 2 ऑक्टोबर या कालावधीत हे बदल लागू राहणार आहेत. या कालावधीत कार्ला फाटा ते श्री एकविरा देवी पायथा मंदिर मार्गावर अवजड आणि मोठ्या वाहनांना पूर्णवेळ प्रवेश निषिद्ध राहील.

27 सप्टेंबर ते 1 ऑक्टोबर पर्यंत, सकाळी 6 ते रात्री 10 या वेळेत जुना मुंबई-पुणे आणि पुणे-मुंबई महामार्गावरील कुसगाव बुद्रुक टोलनाका लोणावळा ते वडगाव फाटा, वडगाव मावळ या दरम्यान अवजड वाहनांना नो एन्ट्री असेल.

या बंदोबस्तामुळे अवजड वाहनांसाठी पर्यायी मार्ग निश्चित करण्यात आले आहेत. जुना मुंबई-पुणे महामार्गावरून पुण्याकडे जाणारी जड वाहने लोणावळा येथील कुसगाव बुद्रुक टोलनाका मार्गे एक्सप्रेस हायवेने उर्से टोलनाक्याद्वारे पुणे शहराकडे वळविण्यात येतील. तर मुंबईकडे जाणारी जड वाहने वडगाव येथील तळेगाव फाटा मार्गे उर्से खिंडीतून एक्सप्रेस हायवेने मुंबईकडे वळविली जातील.

भाविकांची सोय आणि सुरक्षितता यासाठी वाहतूक नियंत्रणाबरोबरच पोलिस आणि प्रशासनाने आवश्यक ती सर्व तयारी केली आहे. लोणावळा परिसरात पोलीस पथके, स्वयंसेवक आणि वाहतूक नियामक कार्यरत राहणार आहेत. तसेच, भाविकांना पार्किंगची अडचण येऊ नये यासाठी मंदिर पायथ्याशी तसेच कार्ला फाट्याजवळ स्वतंत्र पार्किंगची व्यवस्था करण्यात येणार आहे.