क्रिकेटरचं घृणास्पद कृत्य, हायप्रोफाइल पबमध्ये 2 तरुणींना गुपचूप दिले अमली पदार्थ, नशा होताच...

मिळालेल्या माहितीनुसार, ही घटना लंडनमधील चेल्सी येथील 'द बाउंड्री' नावाच्या पबमध्ये घडली. हा पब इंग्लंडच्या अनेक प्रसिद्ध क्रिकेटपटूंच्या भागीदारीत आहे, ज्यात ब्रेंडन मॅक्युलम (इंग्लंडचे मुख्य प्रशिक्षक), जोश बटलर, इऑन मॉर्गन आणि सॅम बिलिंग्ज सारखे दिग्गज खेळाडूंचा समावेश आहे. २२ मे रोजी या पबमध्ये दोन महिलांना ड्रग्ज मिसळलेले पेय देण्यात आले आणि त्यापैकी एका महिलावर लैंगिक अत्याचार झाल्याचा आरोप आहे.

लंडनच्या मेट्रोपॉलिटन पोलिसांनी 'द टेलिग्राफला'ला दिलेल्या प्रतिक्रियेत या वृत्ताला दुजोरा दिला आहे. पोलिसांनी सांगितले की जूनमध्ये या प्रकरणाबद्दल एका ४० वर्षीय पुरूष क्रिकेटरची चौकशी करण्यात आली होती. तथापि, या प्रकरणात आतापर्यंत कोणालाही अटक करण्यात आलेली नाही आणि तपास सुरू आहे.

या घटनेमुळे इंग्लंड आणि वेल्स क्रिकेट बोर्ड (ECB) देखील प्रश्नांच्या भोवऱ्यात आले आहे, कारण त्यांना या प्रकरणाची आधीच माहिती होती, परंतु त्यांनी यावर मौन बाळगले आहे. हे प्रकरण अशा वेळी घडले आहे, जेव्हा इंग्रजी क्रिकेट आधीच लैंगिक गैरवर्तनाच्या अनेक प्रकरणांनी ग्रस्त आहे. गेल्या काही वर्षांत, एका माजी काउंटी प्रशिक्षक आणि एका व्यावसायिक प्रशिक्षकावरही अशाच प्रकारचे आरोप केले होते. त्यानंतर त्यांना खेळातून निलंबित करण्यात आले आहे.

एकंदरीत, ही घटना इंग्लंड क्रिकेटसाठी आणखी एक लज्जास्पद प्रकरण आहे, जी खेळाडूंच्या वर्तनावर आणि संस्थात्मक जबाबदारीवर गंभीर प्रश्न उपस्थित करते. अशा परिस्थितीत, या इंग्लंड क्रिकेटपटूवर काय कारवाई केली जाते हे पाहणे बाकी आहे.