Ruturaj Gaikwad: ऋतुराजने धोनीला बोलण्याचे धाडस दाखवले पाहिजे; CSKच्या माजी खेळाडूने दिला घरचा आहेर

CSK आणि RCB यांच्यातील सामन्यात धोनी नवव्या क्रमांकावर फलंदाजीला आला होता. धोनी जेव्हा फलंदाजीला आला तेव्हा मॅच चेन्नईच्या हातातून गेली होती. धोनीने त्या सामन्यात काही मोठे शॉट खेळले होते. तरीही त्याला एवढ्या खालच्या क्रमांकावर पाठवणे हे चाहत्यांना आणि क्रिकेट तज्ज्ञांना फारसे पटले नाही.

अंबाती रायुडूच्या मते, धोनीच्या फलंदाजीवर संयम ठेवणे संघासाठी चुकीचे ठरू शकते. त्याने गायकवाडला सल्ला दिला की, "कर्णधार म्हणून ऋतुराजने धोनींना सांगायला हवे की, कृपया वरच्या क्रमांकावर फलंदाजी करा, त्याचा संघाला मोठा फायदा होईल.

आयपीएल 2025मध्ये धोनीने पहिल्या दोन सामन्यात विकेटच्या मागे धमाकेदार कामगिरी केली होती. पहिल्या सामन्यात तो फलंदाजीला आला आणि दोन चेंडू खेळले पण धावा केल्या नाहीत. तेव्हा देखील धोनी फलंदाजीला यावा म्हणून जडेजा बाद झाल्याची चर्चा सोशल मीडियावर रंगली होती. त्यानंतर रॉयल चॅलेंजर्स बेंगळुरू विरुद्धच्या लढती जेव्हा आघाडीचे फलंदाज लवकर बाद झाले तेव्हा धोनी थोड्या वरच्या क्रमांकावर फलंदाजीला येईल असे वाटले होते. पण वरचा क्रमांक सोडा धोनी नेहमी ज्या क्रमांकावर फलंदाजी करतो त्या क्रमांकावर देखील आला नाही. आर अश्विन बाद झाल्यानंतर धोनी नवव्या क्रमांकावर फलंदाजीला आला होता. त्यावरून त्याला ट्रोल करण्यात आले होते.