Ukhana Video : लालबागची बबली आणि जोगेश्वरीचा बंटी! सोशल मीडियावर तुफान व्हायरल कपलचा भन्नाट उखाणा

उखाणा घेणं म्हणजे कित्येक पुरुषांसाठी परीक्षेचा पेपर देण्यासारखं... एखादा उखाणा पाठ करून ठेवायचा, ऐनवेळी तोही आठवत नाही मग आपला मेथीचा उखाणा ठरलेला.  बहुतेक नवरदेवांना तुम्ही भाजीत भाजी मेथीचा हा उखाणा घेताना पाहिलं असेल. पण या नवरदेवाने मात्र उखाण्यावर फार मेहनत घेतल्याचं दिसतं आहे. मेथीची भाजी सोडा, त्याने कोणता रेडीमेड उखाणाही घेतला नाही. तर स्वतःचा हटके असा उखाणा तयार करून त्याने घेतला आहे. त्याचा उखाणा ऐकून तर नवरीबाईही थक्क झाली. तीसुद्धा पाहतच राहिली.

आता असा या नवरदेवाने काय किंवा कोणता उखाणा घेतला हे ऐकण्यासाठी तुमचेही कान आतुरले असतील. तर ऐका... नवरदेव म्हणतो, शिवराज यादव चाळ, दुर्गा नगर, जोगेश्वरी 60, रूम नंबर 1; दरवाजाला अडकवली घंटी, शिवानीचं नाव घेतो ती माझी बबली मी तिचा बंटी.

@sudesh_nawar_vlogs इन्स्टाग्राम अकाऊंटवर हा व्हिडीओ पोस्ट करण्यात आला आहे. हा इन्स्टाग्राम व्हिडीओ पोस्ट करताना बबली weds बंटी असं कॅप्शन दिलं आहे. तर व्हिडीओवर लालबागची बबली meets जोगेश्वरीचा बंटी असं लिहिलं आहे. तसंच नवरदेवाचा उखाणा संपल्यावर जेव्हा नवरीचा उखाणा घेण्याचा टर्न येतो तेव्हा सगळे आता लालबाग, असं ओरडताना दिसतात. यावरून नवरदेव जोगेश्वरीचा आणि नवरीबाई लालबागची आहे, हे समजतं.

त्यानंतर नवरीबाई उखाणा घेते, पण नवरदेवाच्या उखाण्यासमोर नवरीचा उखाणा काहीच वाटत नाही.  तुम्हाला हा लालबागची बबली आणि जोगेश्वरीच्या बंटीचा उखाणा कसा वाटला? आवडला का? तुम्ही तुमच्या लग्नात कोणता उखाणा घेतला होता? किंवा तुमच्या जवळच्या व्यक्तीने असा काही भन्नाट उखाणा घेतला होता का? आम्हाला आमच्या सोशल मीडियाच्या कमेंट बॉक्समध्ये नक्की सांगा.