कलयुगी पुत्र! आईच्या चितेवर बसून मागितले दागिने, अंत्यसंस्कारात घातला गोंधळ. पहा VIDEO

ही घटना राजस्थानमधील लीला का बास की ढाणी या गावात 3 मे रोजी घडली. या घटनेचा व्हिडिओ सोशल मीडियावर चांगलाच व्हायरल झाला आहे. त्यात तो माणूस आपल्या आईच्या चितेवर चढून बसलेला दिसत आहे आणि तिच्याकडील दागिने त्याला देण्याची मागणी करत आहे. गावकऱ्यांनी सांगितलं की, मृत महिलेचं नाव भूरी देवी होतं. त्यांचं 3 मे रोजी निधन झालं. भूरी देवी यांना सात मुलं होती. त्यापैकी सहा गावातच राहत होते, पण पाचवा मुलगा ओमप्रकाश वेगळा राहत होता. गेल्या काही वर्षांपासून ओमप्रकाश आणि त्याच्या इतर भावांमध्ये कौटुंबिक मालमत्तेवरून वाद सुरू होता.

मिळालेल्या माहितीनुसार, मृत्यूनंतर घरी काही विधी झाल्यावर वृद्ध महिलेच्या अंगावरील चांदीचे आणि इतर दागिने काढण्यात आले. त्यानंतर अंत्यसंस्कारासाठी मृतदेह स्मशानभूमीत नेण्यात आला. आईचे सगळे दागिने मोठ्या मुलाकडे, गिरिधारीकडे सोपवण्यात आले होते. त्यानंतर वृद्ध महिलेच्या अंत्यसंस्कारासाठी चिता रचण्याचं काम सुरू होतं. त्याच वेळी ओमप्रकाश आणि त्याच्या इतर भावांमध्ये वाद सुरू झाला.

ओमप्रकाश त्याच्या इतर भावांसोबत आईचा मृतदेह खांद्यावर घेऊन स्मशानभूमीत आला. तिथे त्याने त्याच्या आईचे सगळे दागिने त्याला देण्याची मागणी केली. भावांबरोबर वाद सुरू असतानाच, ओमप्रकाश अचानक त्याच्या आईच्या चितेवर झोपला. सगळ्यांना आश्चर्य वाटलं, त्याने मागणी केली की जोपर्यंत त्याला दागिने मिळत नाहीत तोपर्यंत तो त्याच्या आईचा अंत्यसंस्कार होऊ देणार नाही.