कपाशीवर लाल्या बघून घाबरुन जाण्याचे कारण नाही, असे करा व्यवस्थापन, कृषी तज्ज्ञांनी दिली महत्त्वाची माहिती

त्यानंतर काही शेतकऱ्यांनी खताचे नियोजन केले आणि मग कपाशी वर रस शोषण करणाऱ्या किडी आल्यात. मावा, पांढरी माशी, तुडतुडे, फुलकिडे यासारखे किडे रस शोषून घेतात. याचे व्यवस्थापन न केल्यास सुद्धा लाल्या या रोगाची लक्षणे आपल्याला दिसतात. त्याचबरोबर या काळामध्ये अन्नद्रव्याचा भरपूर पुरवठा करणे गरजेचे आहे. अन्नद्रव्य व्यवस्थापन, पाणी व्यवस्थापन हे काळात अत्यंत गरजेचे आहे. यामुळे सुद्धा लाल्याचा प्रादुर्भाव टाळता येऊ शकतो, असं श्यामसुंदर ताठोडे यांनी सांगितले.

आपल्या कपाशी पिकाच्या पानामध्ये अँथोसायनिन नावाचे लाल कण आतमध्ये लपलेले असतात. त्यावर चादरीसारखा हिरवा थर असतो. पण अन्नद्रव्याची कमतरता, पाण्याची कमतरता यामुळे ती हिरवी चादर निघून जाते आणि आतील लाल कण बाहेर दिसायला लागतात, यालाच आपण लाल्या म्हणतो. व्यवस्थापन जर व्यवस्थित केले तर लाल्या आपल्या कपाशीवरून निघून जाऊ शकतो आणि नवीन पाने हिरवीगार दिसू लागतात, असं श्यामसुंदर ताठोडे सांगतात.

ज्या शेतकऱ्यांच्या कपाशीला पाण्याची कमतरता आहे. त्या शेतकऱ्यांनी 15 ऑक्टोबर पर्यंत कपाशीला पाणी देणे गरजेचे आहे. त्यांनतर ज्या शेतकऱ्यांची कपाशी पिवळी पडली आहे. पानगळ होत आहे. अशा शेतकऱ्यांनी कपाशीला अन्नद्रव्याचा पुरवठा करणे गरजेचे आहे.